تۇڭعىش پرەزيدەنت نۇرسۇلتان نازاربايەۆ حالىقارالىق قاۋىپسىزدىك جانە جاھاندىق يادرولىق ديالوگتى قايتا باستاۋ ماسەلەلەرى بويىنشا حالىقارالىق ونلاين كونفەرەنسياعا قاتىستى.

– COVID-19 پاندەمياسى داعدارىسقى ۇشىراتتى. ءبىراق ادامزات ءوز تاريحىندا مۇنداي دەڭگەيدەگى تەگەۋرىندەرمەن بۇرىن دا كەزدەسىپ، جەڭىپ كەلەدى. حالىقارالىق بىرلەستىكتەر بۇل سترەس-تەستتەن دە امان ءوتىپ، بۇل جولدى جەڭىمپاز رەتىندە باسىپ وتەتىنىنە سەنىمدىمىن. قۇرمەتتى دوستار! بيىل الەم تراگەديالىق داتانى اتاپ ءوتتى. وسىدان 75 جىل بۇرىن يادرولىق قارۋ ءبىرىنشى رەت جارىلعان بولاتىن. سودان بەرى ادامداردىڭ بىرنەشە بۋىنى ءوسىپ جەتىلىپ، حيروسيما مەن ناگاساكي اپاتىن ەستەن شىعارا باستادى. الايدا جاھاندىق يادرولىق ارحيتەكتۋراعا جۇرگىزىلگەن تالداۋ جاعدايى بۇل بۇرىس ءارى ءقاۋىپتى جول ەكەنىن كورسەتىپ وتىر، – دەپ اتاپ ءوتتى ەلباسى.

نازاربايەۆ سىرتقى ساياساتتاعى جۇمىسىنىڭ ءبىرشاما بولىگىن – يادرولىق قارۋدان ەركىن يدەياسى مەن جەتىستىگىنە ارناعانىن ايتتى.

– ولاي ەتۋىمنىڭ سەبەبى بىرىنشىدەن، قازاقستان يادرولىق قارۋ سىناعىنىڭ بۇكىل قايعى-قاسىرەتىن سەزىنە بىلگەن مەملەكەت. سەمەيدەگى پوليگوننان مەنىڭ 1،5 ميلليونعا جۋىق وتانداسىم زارداپ شەكتى. مەنىڭ جارلىعىم بويىنشا الەمدەگى ەڭ ءىرى پوليگونداردىڭ ءبىرى 1991 جىلعى 29 تامىزدا جابىلدى. بۇل شەشىم – يادرولىق سىناقتارعا زاڭدى تۇردە تىيىم سالاتىن ادامزات تاريحىنداعى ەڭ العاشقى شەشىم بولاتىن. كەيىن باسقا مەملەكەتتەر دە ءوز پوليگوندارىن جاپتى. وسىلايشا مەنىڭ ەلىمنىڭ ۇلگىسىن باسقا ەلدەردە دە قولداپ، بۇل باستاما جاھاندىق سيپاتقا يە بولدى. سونىمەن قاتار بۇل شەشىم 1996 جىلى بارىنە يادرولىق سىناقتارعا جاپپاي تىيىم سالعان كەلىسىمگە نەگىز بولدى، – دەدى ول.