بىرىككەن ۇلتتار ۇيىمىنىڭ بۇرىنعى باس حاتشىسى پان گي مۋن "نۇرسۇلتان نازاربايەۆ – جاھاندىق اۋقىمداعى ساياساتكەر" اتتى حالىقارالىق كونفەرەنسيادا ءسوز سويلەگەن العاشقى سپيكەرلەردىڭ ءبىرى. ول ورتاق بولاشاقتى قۇرۋعا كومەكتەسۋ ءۇشىن وتكەنىمىزدە جاھاندىق بەيبىتشىلىك پەن قاۋىپسىزدىكتى ىلگەرىلەتۋگە ۋاقتىلى ىقپال ەتكەن ەرەن كوشباسشىلىق كورىنىس تاپقان كەزەڭدەردى جەكە دارا كورسەتۋ وتە ماڭىزدى ەكەندىگىن اتاپ ءوتتى، دەپ جازادى ortcom.kz سايتى.

سپيكەردىڭ ايتۋىنشا، سوڭعى ونجىلدىقتارداعى وسىنداي ماڭىزدى ساتتەردىڭ ءبىرى – قازاقستانداعى سەمەي يادرولىق سىناق پوليگونىنىڭ ءساتتى جابىلۋى جانە كەڭەستىك ستراتەگيالىق يادرولىق ارسەنالدان ءوز ەركىمەن باس تارتۋى بولدى. بۇل ادامزات ءۇشىن، ءبىزدىڭ پلانەتامىز ءۇشىن تاريحي شەشىم بولدى. پوليگوندا جاسالعان 500-دەن استام جارىلىس جەرگىلىكتى تۇرعىنداردىڭ دەنساۋلىعى مەن قاۋىپسىزدىگىنە، قورشاعان ورتاعا ۇلكەن زيانىن تيگىزدى.

– ايماقتىق جانە حالىقارالىق قاۋىپسىزدىكتى نىعايتقان بۇل باتىل قادام سونىمەن قاتار قازاقستاننىڭ يادرولىق قارۋسىزدانۋ مەن تاراتپاۋ سالاسىنداعى جاھاندىق كوشباسشىلىعىنىڭ باستاماسى بولدى، سونداي-اق سىرتقى ساياساتتىڭ تابىستى بولۋىنا جانە جاس ۇلتتىڭ جاڭا قالىپتاسىپ كەلە جاتقان ديپلوماتياسىنىڭ جاڭا بيىكتەرگە كوتەرىلۋىنە ىقپال ەتتى. بۇعان 2002 جىلعى مامىرداعى يادرولىق سىناقتارعا جاپپاي تىيىم سالۋ تۋرالى كەلىسىمدى راتيفيكاسيالاۋ؛ 2015 جىلى بىرىككەن ۇلتتار ۇيىمى باس اسسامبلەياسىنىڭ يادرولىق قارۋسىز الەم قۇرۋ تۋرالى ماڭىزدى دەكلاراسياسىن قابىلداۋعا باستاماشىلىق ەتۋ، جانە بىرىككەن ۇلتتار ۇيىمىنا 29 تامىزدى حالىقارالىق يادرولىق سىناقتارعا قارسى ءىس-قيمىل كۇنى دەپ جاريالاۋعا جاردەمدەسۋ دە كىرەدى. بىرىككەن ۇلتتار ۇيىمىنىڭ بۇرىنعى باس حاتشىسى رەتىندە مەن شەشۋشى كوشباسشىلىق ماڭىزدى ساتتەردە جەكەلەگەن حالىقتاردىڭ عانا ەمەس، بۇكىل الەمنىڭ تراەكتورياسىن وزگەرتۋگە كومەكتەسە الاتىندىعىنا بىرنەشە رەت كۋا بولدىم. وسى مۇمكىندىكتى پايدالانىپ، بارلىق جاھاندىق كوشباسشىلارعا بۇۇ-نىڭ يادرولىق سىناقتار مەن تاراتۋعا تىيىم سالىنعان الەمدى، سونداي-اق ءبىز يادرولىق قارۋدان تولىعىمەن ازات بولاتىن الەمدى قۇرۋعا جاردەمدەسۋدە كۇش-جىگەرىن قايتا جانداندىرۋعا شاقىرامىن، – دەپ اتاپ ءوتتى پان گي مۋن ەلباسى نازاربايەۆقا سول تاريحي شەشىمى ءۇشىن، سونداي-اق قازاقستاننىڭ جارقىن الەمدى قۇرۋعا كومەكتەسۋ جولىندا جالعاسىن تاۋىپ جاتقان كۇش-جىگەرى ءۇشىن زور ريزاشىلىعىن بىلدىرە وتىرىپ.