ۇلى ابايدىڭ 175 جىلدىعى اياسىندا اقىننىڭ وزبەك تىلىنە اۋدارىلعان شىعارمالارى مەن شىعىستىڭ عۇلاما شايىرى الىشەر ءناۋايدىڭ قازاق تىلىندە جارىق كورگەن «حامسا» اتتى كىتابى كوپشىلىككە تانىستىرىلدى، دەپ حابارلادى ق ر پارلامەنتى سەناتىنىڭ باسپا ءسوز قىزمەتى.

كىتاپتاردىڭ تۇساۋكەسەر راسىمىنە پارلامەنت سەناتىنىڭ ءتوراعاسى ماۋلەن اشىمبايەۆ، وزبەكستاننىڭ وليي ءماجىلىس سەناتىنىڭ ءتورايىمى تانزيلا ناربايەۆا، حالىقارالىق تۇركى اكادەمياسىنىڭ پرەزيدەنتى دارحان ءقىدىرالى، تۇركيا، وزبەكستان، قىرعىزستان ەلدەرىنىڭ قازاقستانداعى ەلشىلەرى، ءماجىلىس دەپۋتاتتارى جانە ءبىرقاتار اقىن-جازۋشى مەن زيالى قاۋىم وكىلدەرى قاتىستى.

ماۋلەن اشىمبايەۆ بۇل كۇننىڭ قازاق جانە وزبەك ادەبيەتى ءۇشىن، سونداي-اق، تۇتاس تۇركى جۇرتى ءۇشىن ماڭىزى زور ەكەنىن ايتتى.

"اباي قازاقتىڭ عانا اقىنى ەمەس. ول – بارشا ادامزاتقا ورتاق عۇلاما. اقىننىڭ وي-تولعامدارى مەن وسيەتى بارشا تۇركى جۇرتىنا ارنالعان دەسەك تە، ارتىق بولا قويماس. قازىرگىدەي سىن-قاتەرلەر زامانىندا ءبىز وسىنداي ورتاق قۇندىلىقتارىمىزدى كەڭىنەن دارىپتەۋىمىز كەرەك. اسىرەسە، جاس بۋىنعا جان-جاقتى ناسيحاتتاساق، تۇركى دۇنيەسىنىڭ بىرلىگىن نىعايتۋعا قوسىلعان ۇلكەن ۇلەس بولار ەدى"، – دەدى سەنات ءتوراعاسى.

سونىمەن قاتار ول اباي مەن ناۋاي مۇرالارىنىڭ رۋحاني ساباقتاستىعىنا نازار اۋداردى.

"شىعىس شايىرلارىنىڭ دارا تۇلعاسى، ەجەلگى تۇركى ادەبيەتىنىڭ اتاسى الىشەر ءناۋايدىڭ ەڭبەگىن قازاق تىلىنە اۋدارۋدى ماڭىزدى وقيعا دەپ قابىلدايمىز. بۇل – قازاق ادەبيەتىنە قوسىلعان قۇندى ۇلەس. اباي ءناۋايدى ءوزىنىڭ رۋحاني ۇستازى ساناپ، ونىڭ ولەڭدەرىنەن تاعىلىم العانىن ءبارىمىز جاقسى بىلەمىز. وسى تۇرعىدان كەلگەندە، ەكى بىردەي كەمەڭگەردىڭ ەڭبەكتەرىن قاتار اۋدارۋدىڭ سيمۆوليكالىق ءمانى بار"، – دەگەن ماۋلەن اشىمبايەۆ ناۋاي پوەزياسىنىڭ ماڭىزى مەن الەمدىك ادەبيەتتەگى ورنى تۋرالى دا ءسوز قوزعادى.

سالتاناتتى ءراسىم كەزىندە وزبەكستان وليي ءماجىلىسى سەناتىنىڭ ءتورايىمى تانزيلا ناربايەۆا، وزبەكستاننىڭ قازاقستانداعى توتەنشە جانە وكىلەتتى ەلشىسى سايديكرام نيازحودجايەۆ، ءماجىلىس دەپۋتاتى ساۋىتبەك ابدراحمانوۆ جانە اقىن نەسىپبەك ايت ۇلى ءسوز سويلەپ، مۇنداي شارالار تۇركى الەمىنىڭ ىنتىماعىن نىعايتا تۇسەتىنىن ايتتى.

«حامسا» – الىشەر ءناۋايدىڭ ايگىلى بەس داستاننان تۇراتىن ەڭبەگى. قازاق تىلىندە جارىق كورگەن كىتاپقا «ءلايلى-ماجىن» جانە «ەسكەندىر قورعانى» اتتى ەكى داستان ەنگەن. بۇل شىعارمالاردى كونە وزبەك تىلىنەن قازاقتىڭ بەلگىلى اقىنى نەسىپبەك ايت ۇلى اۋداردى. شالقار شابىتپەن، اسقان شەبەرلىكپەن ءتارجىمالانعان جاۋھار تۋىندىلار باۋىرلاس ەكى ەل اراسىنداعى ادەبي جانە مادەني بايلانىستاردىڭ التىن كوپىرىنە اينالارى ءسوزسىز.

بۇل يگىلىكتى ىسكە حالىقارالىق تۇركى اكادەمياسى ۇيىتقى بولدى. وسى رەتتە اكادەميانىڭ مۇرىندىق بولۋىمەن بۇعان دەيىن دە بۇل باعىتتا ءبىرقاتار ماڭىزدى باستاما جۇزەگە اسىرىلعانىن اتاپ وتكەن ءجون.