ۇلىتاۋ وبلىسىنىڭ «سارىارقا» قوعامدىق بىرلەستىگىنىڭ وكىلدەرى Qamshy.kz پورتالىنىڭ رەداكسياسىنا حابارلاسىپ، وڭىردە قۇرىلعان كونستيتۋسيالىق كواليسيا مۇشەلەرىنە ءبىرقاتار ناقتى تالاپ قويدى. قوعام بەلسەندىلەرى كونستيتۋسيا جوباسىن ءتۇسىندىرۋ جۇمىستارى فورماليزمنەن ارىلىپ، اشىق ءارى مازمۇندى قوعامدىق تالقىلاۋعا ۇلاسۋى ءتيىس ەكەنىن اتاپ ءوتتى.

ۇلىتاۋ وبلىسىندا قۇرىلعان كونستيتۋسيالىق كواليسيا مۇشەلەرىنە تالاپ!
      ۇلىتاۋ وڭىرىندە كونستيتۋسيا جوباسىن  حالىققا ءتۇسىندىرۋ ماقساتىندا كواليسيا قۇرىلعانى جاريالاندى. الايدا ونىڭ شىنايى ناتيجەسى تەك رەسمي كەزدەسۋلەر  مەن ەسەپ ءۇشىن تۇسىرىلگەن بەينەجازبالار حاقىندا عانا شەكتەلمەۋى ءتيىس.
      ەڭبەك ۇجىمدارىندا وتەتىن ءتۇسىندىرۋ جۇمىستارى كوبىنە فورمالدى، ۇيرەنشىكتى سيپاتتا وتەدى جانە ناقتى قوعامدىق تالقىلاۋ دەڭگەيىنە جەتە بەرمەيتىنىن ءبارىمىز انىق بىلەمىز، ونىڭ اياعى تەك ادەمى سۋرەتكە تۇسۋمەن عانا شەكتەلەدى.
       كواليسيا قۇرىلعاننان بەرى ونىڭ بىردە-بىر مۇشەسىنىڭ الەۋمەتتىك جەلىدەگى  پاراقشالارىندا كونستيتۋسيانىڭ ناقتى قاي باپتارى وزگەرگەنى، ولاردىڭ بۇرىنعى جانە ۇسىنىلىپ وتىرعان جاڭا نۇسقالارى، سونداي-اق ولاردىڭ ارتىقشىلىقتارى مەن ىقتيمال كەمشىلىكتەرى تۋرالى تولىق ءارى اشىق اقپارات كەزدەستىرمەدىك. نەگە؟
       قازىرگى زامان اقپاراتتىق تەحنولوگيا زامانى. حالىقتىڭ باسىم بولىگى، اسىرەسە جاستار، اقپاراتتى الەۋمەتتىك جەلىلەر ارقىلى الادى. ناقتى قوعامدىق پىكىر دە سول جەردە قالىپتاسادى.
        وسىعان بايلانىستى، «سارىارقا» قوعامدىق بىرلەستىگى كونستيتۋسيالىق كواليسيانىڭ ءاربىر مۇشەسىنە كەلەسى تالاپتاردى قويادى:
1. كونستيتۋسيا جوباسىنىڭ بارلىق 96 بابىنىڭ ىشىندە، وزگەرىسكە ۇسىنىلعان ءاربىر بابىن جەكە - جەكە جاريالاۋ.
2. ءار باپتىڭ بۇرىنعى جانە جاڭا نۇسقاسىن سالىستىرمالى تۇردە كورسەتۋ.
3. وزگەرىستەردىڭ ماقساتى، ارتىقشىلىقتارى جانە ىقتيمال تاۋەكەلدەرى تۋرالى اشىق تۇسىندىرمە بەرۋ.
4. الەۋمەتتىك جەلىلەردە اشىق تالقىلاۋ ۇيىمداستىرىپ، ازاماتتاردىڭ پىكىرىنە بەلسەندىلىك تانىتىپ جاۋاپ بەرۋ.

        مىسالعا ، سۋپەر -پرەزيدەنتتىك باسقارۋ فورماسىنان كەتتىك دەسەك، ناقتى قاي باپتارمەن انىقتاۋعا بولادى،  سوت وكىلدەرىن سايلاۋ ارقىلى بەكىتۋگە قانداي كەدەرگى بار،  قۇرىلتايعا دەپۋتاتتاردى سايلاۋ تەك پارتيالىق تىزىممەن وتسە، ول پارتيالار كوڭىلدەن شىقپاعان  جاعدايدا حالىق كىمگە داۋىس بەرۋى كەرەك، زاڭ  الدىندا ءبارى تەڭ دەگەن 16 باپپەن  48 باپتىڭ 1 تارماعى قايشى كەلمەيمە  جانە  ت.ب. كوپتەگەن سۇراقتار بار.
        كونستيتۋسيالىق وزگەرىستەر - ۇرپاق الدىنداعى ۇلكەن جاۋاپكەرشىلىك. سوندىقتان كواليسيا مۇشەلەرى ۇرپاق الدىنداعى الىپ جاۋاپكەرشىلىكتى  البەتتە ءتۇسىنۋى  كەرەك.  
        سول سەبەپتى، كوپشىلىكتى رەفەرەندۋمدا داۋىس بەرۋگە كوندىرگەننەن  گورى، سەندىرگەن دۇرىس!

 قۇرمەتپەن: «سارىارقا»  قوعامدىق بىرلەستىگى.