الماتىدا اباي قۇنانباي ۇلىنىڭ 175 جىلدىعىنا ارنالعان «100 ولەڭ» رەسپۋبليكالىق كوركەمسوز وقۋ سايىسى ءوتىپ جاتىر.

سايىسقا رەسپۋبليكامىزدىڭ ءار وڭىرىنەن ىرىكتەلىپ شىققان 15 ادام قاتىسۋدا.  

سايىستىڭ فينالدىق كەزەڭىنە وتكەن قاتىسۋشىلار ASSYLTAS قوعامدىق قورى توپتاستىرعان 100 ولەڭدى جاتقا ايتىپ جارىسادى. 100 ولەڭ جيناعىنا مايلىقوجا، ءسۇيىنباي، اباي، جامبىل، مۇقاعالي باستاعان اقىنداردان باستاپ، بۇگىنگىنىڭ ۇزدىكتەرى ۇلىقبەك ەسداۋلەت، ءجۇرسىن ەرمان، جاراس سارسەك، جاناربەك ءاشىمجان، اقبەرەن ەلگەزەك، باقىت بەدەلحان سىندى پوەزيا مايتالماندارىنىڭ ولەڭدەرى كىرگەن. 

باستاپقىدا 50-دەن استام قاتىسۋشى ءوتىنىش ءبىلدىرىپ، ونلاين رەجيمدە وتكەن بايقاۋدا ونەر كورسەتكەن. سولاردىڭ ىشىنەن ىرىكتەلىپ شىققان 15 ادام بايقاۋدىڭ فينالىنا جولداما العان.

بۇگىنگى بايقاۋدىڭ ءبىرىنشى كەزەڭ شارتى بويىنشا ءار قاتىسۋشى قورجىنعا سالىنعان ولەڭدەردى الىپ، ونى تولىق وقۋى ءتيىس. بۇل كەزەڭدە بىردەن بەس ولەڭدى وقيدى، سونىڭ ءىشىندى ەكەۋىن تولىق جاتقا وقىماسا كەلەسى كەزەڭگە وتە المايدى.
ەكىنشى كەزەڭدە ءادىلقازىلار سايىسقا ارالاسادى. ولار جيناققا ەنگىزىلگەن 100 ولەڭنىڭ كەمى ونىنىڭ كەز كەلگەن جەرىنەن سۇرايدى. قاتىسۋشى ەكى ولەڭنەن شاتاسسا كەلەسى كەزەڭگە وتپەيدى.

ال،«شاپپا-شاپ» كەزەڭىنە ءتورت قاتىسۋشى وتەدى. ولار ەكى جۇپقا ءبولىنىپ، 100 ولەڭنىڭ كەز كەلگەن جەرىنەن سۇراپ، ءبىر-بىرىن تەكسەرەدى. مۇندا جەڭىمپاز ەكى ۇپاي ايىرماشىلىعىمەن جەڭۋى ءتيىس. فينالعا وتكەن ەكى قاتىسۋشى دا وسى ادىسپەن جەڭىسكە تالاسادى.

جامبىل وبلىسىنان كەلگەن ون ءتورت جاسار قۋانىش كەنەشباي بايقاۋعا قاتىسقالى اباي ولەڭدەرىن تەرەڭ تۇسىنە تۇسكەنىن ايتادى.

"سايىسقا جاقسى دايىندالىپ كەلگەن ەدىم، دەگەنمەن ساحناعا شىققاندا قوبالجۋ بولدى. جالپى سايىسقا قاتىسقالى ءسوز قورىم كوبەيىپ، اباي ولەڭدەرىن تەرەڭ تۇسىنە باستادىم"،-دەيدى جاس قاتىسۋشى.

جارىس قورىتىندىسى بويىنشا ءۇش  جەڭىمپاز انىقتالادى. ءبىرىنشى ورىنعا ASSYLTAS قوعامدىق قورى تاعايىنداعان اۆتوكولىك سيعا بەرىلەدى.

ۇيىمداستىرۋشىلار اتالعان شارا اباي ولەڭدەرىن جاستار اراسىندا كەڭىنەن ناسيحاتتاۋعا ارنالعانىن ايتادى. 

"العاشىندا بۇل سايىستى شىعىس قازاقستاندا جىلدا ءوتىپ تۇراتىن «تۇعىرى بيىك تارباعاتاي» اتتى فەستيۆال اياسىندا وتكىزگىمىز كەلگەن. الايدا پاندەمياعا بايلانىستى ول وتپەدى. دەگەنمەن اباي اتامىزدىڭ 175 جىلدىعىنا ارناپ وتكىزۋ ءساتى تۋدى. سايىسقا قاتىسۋشىلاردى قىزىقتىرۋ ءۇشىن باس جۇلدەگە كولىك تىكتىك، مۇنداي سىيلىق بۇرىن بولماعان ەكەن"، - دەيدى ASSYLTAS قوعامدىق قورىنىڭ باسشىسى دۋلات تاستەكەيەۆ.