الماتى اكىمى باقىتجان ساعىنتايەۆ بوستاندىق اۋدانىنداعى جۇمىس ساپارى كەزىندە الەۋمەتتىك ماڭىزى بار نىسانداردا بولدى، سونىمەن قاتار قوعامدىق كەڭىستىكتەردى اباتتاندىرۋ بارىسىمەن تانىستى.
"بوستاندىق اۋدانى. جۇمىس ساپارى كەزىندە ءبىرقاتار الەۋمەتتىك نىسانداردى ارالادىم. Ten Qogam ورتالىعىندا مۇمكىندىگى شەكتەۋلى ازاماتتاردى جاڭا ماماندىققا وقىتىپ نەمەسە كاسىبي بىلىكتىلىگىن دامىتۋ ارقىلى جۇمىسقا ورنالاسۋعا كومەك كورسەتىلەدى. جوبانى «شىراق» قب مۇگەدەكتىگى بار ايەلدەر قاۋىمداستىعى» جۇزەگە اسىرۋدا. ال «اۋەن الەمى» جوباسى بالالاردىڭ مۋزىكالىق قابىلەتىن دامىتۋعا باعىتتالعان. مۇندا بالالار دومبىرا، گيتارا مەن شاڭقوبىزدا ويناۋعا تەگىن ۇيرەتىلەدى" - دەدى باقىتجان ساعىنتايەۆ.
ونىڭ ايتۋىنا قاراعاندا، ديپلومنان كەيىنگى ءبىلىم بەرۋدىڭ حالىقارالىق ينستيتۋتىنىڭ ماماندارى مەديسينا قىزمەتكەرلەرىنە حالىقارالىق ستاندارت بويىنشا بىلىكتىلىكتى ارتتىرۋ كۋرستارىن ۇيىمداستىردى.
"مۇندا كوپسالالى كلينيكا اشىلدى. سونداي-اق Tamos Education مەكتەبىنىڭ، ۇلتتىق كيىم مەن كادەسىي ونىمدەرىن تىگەتىن سەحتىڭ دامۋ جوسپارىمەن، اۋلالار، ساياباق، سكۆەرلەر مەن جاياۋ جۇرگىنشىلەر ايماعىن اباتتاندىرۋ جۇمىستارىنىڭ بارىسىمەن تانىستىم. بۇل جۇمىس قالا تۇرعىندارىنىڭ پىكىرى مەن تىلەكتەرى ەسكەرىلە وتىرىپ جۇرگىزىلۋدە"، - دەدى اكىم.
پىكىر قالدىرۋ