فيلوسوفيا عىلىمدارىنىڭ دوكتورى، پروفەسسور، عۇمىرىنىڭ سوڭىنا دەيىن قازاق ۇلتتىق قىزدار پەداگوگيكالىق ۋنيۆەرسيتەتىندە قىزمەت اتقارعان ۇلاعاتتى عالىم ساپار وسپانوۆتىڭ «رۋحاني-جاڭعىرۋ-تانۋ نەگىزدەرى» اتتى كونسەپتۋالدى-مونوگرافيالىق وقۋلىعى جارىق كوردى. بۇل تۋرالى اتالعان وقۋ ورنىنىڭ باسپا ءسوز قىزمەتى حابارلادى.

ەڭبەكتە ادامزاتتىڭ رۋحاني قۇبىلىسىنىڭ فيلوسوفيالىق، تەوريالىق جانە ونى زەرتتەۋدىڭ ءادىسنامالىق ماسەلەلەرى جۇيەلى تۇردە كورسەتىلگەن. ونىڭ اسا قۇندى نەگىزى – «رۋح»، «رۋحانيات»، «رۋحانياتتىلىق» قۇبىلىستارىنىڭ الەم فيلوسوفياسىنىڭ مازمۇنى تۇرعىسىنان تالدانىپ، اشىلعان. ادامزات تاريحىنداعى وسى ماسەلەگە قاتىستى ويلار مەن دانالىق پايىمدار تۇڭعىش رەت قازاق تىلىندە جۇيەلى تۇردە كەلتىرىلگەن.

سونىمەن قاتار وقۋلىقتا قازاق حالقىنىڭ تاريحىنداعى رۋح ماسەلەسىنىڭ باستاۋلارى، دامۋ كەزەڭدەرى، قازىرگى ماسەلەلەرى قاراستىرىلعان.

"كىتاپ «تەوريالىق جانە ءادىسنامالىق ىزدەنىستەر»، «ەجەلگى دۇنيەتانىمدارداعى رۋحانياتتىلىق باستاۋلارى»، «باتىس ەۋروپا ەلدەرى فيلوسوفياسىنداعى رۋحانياتتىلىق ماسەلەسىنىڭ دامۋى» جانە «پروتوقازاق-قازاق رۋحانياتتىلىعى» اتتى بولىمدەر مەن 11 تاراۋدان تۇرادى"، - دەلىنگەن حابارلامادا.

ساراپشىلاردىڭ ايتۋىنشا، وقۋلىق وتە كۇردەلى جانە كوكەيتەستى ماسەلەلەردى اسا اكتۋالدى تەوريالار تۇرعىسىنان كورسەتكەن. بۇل جۇمىستىڭ زاماناۋي الەۋەتىن جوعارى كوتەرۋگە ىقپال ەتەدى.

كونسەپتۋالدى وقۋلىق ورتا ارنايى جانە جوعارى وقۋ ورىندارىنىڭ ستۋدەنتتەرىنە، ماگيسترانتتارىنا، دوكتورانتتارىنا جانە وسى تاقىرىپقا قىزىعۋشىلىق تانىتاتىن بارلىق وقىرمان قاۋىمعا ارنالعان.