ەلىمىزدە «ابايدىڭ مۇراسى – ادامزات قازىناسى» اتتى الەۋمەتتىك روليكتەر مەن قىسقامەتراجدى فيلمدەر فەستيۆالى وتەدى، دەپ حابارلايدى Almaty.tv.

مادەني ءىس-شارا قازاقتىڭ ويشىلى اباي قۇنانباي ۇلىنىڭ مۇراسىن ناسيحاتتاۋعا جانە حالىقتىڭ مادەني جانە رۋحاني دەڭگەيىن ارتتىرۋعا باعىتتالعان. بايقاۋعا كەلىپ تۇسكەن وتىنىمدەردىڭ بارلىعى ىرىكتەلىپ اقتىق سىنعا 30 فيلم جىبەرىلگەن. كونكۋرس قاتىسۋشىلارىنىڭ اراسىنان ۇزدىك تۋىندىلاردىڭ اۆتورلارى ون نوميناسيا بويىنشا ماراپاتقا يە بولادى. فەستيۆالدى 7-10 قاراشا ارالىعىندا ساعات كەشكى 18:00 ەكراندا كورسەتىلگەن سىلتەمە بويىنشا تاماشالاۋعا بولادى. بايقاۋعا ابايتانۋشى عالىمدار مەن قازاقستاننىڭ ەڭبەك سىڭىرگەن قايراتكەرلەرىنەن قۇرالعان ءادىلقازىلار القاسى تورەلىك ەتەدى.

«ابايدىڭ قارا سوزدەرىنە ارنالعان، جالپى ابايدىڭ ءومىرى مەن شىعارماشىلىعىنا ارنالعان فيلمدەر بارشىلىق. ءبىراق وسى ابايدىڭ قارا سوزدەرى، ابايدىڭ شىعارماشىلىعىمەن بايلانىستى فەستيۆالدىڭ ءوتۋى شىن مانىندە العاش رەت دەپ ويلايمىن، – دەدى قازاقستان كينەماتوگرافيستەر وداعىنىڭ مۇشەسى، ونەرتانۋ عىلىمدارىنىڭ كانديداتى نازيرا راحمان.