دەنساۋلىق ساقتاۋ ۆيسە-مينيسترى، قازاقستاننىڭ باس مەملەكەتتىك سانيتار دارىگەرى ەرلان قياسوۆ ەلدەگى ەپيدەميولوگيالىق جاعدايدى مالىمدەدى. 

– قازاقستان بۇگىنگى كۇنى "جاسىل" ايماقتا. قازىرگى ۋاقىتتا COVID-19 تارالۋى بويىنشا تومەنگى تاۋەكەل ايماعىندا تۇر. 9 جەلتوقسانعا سايكەس COVID-19 وڭ ناتيجەلى 138 382 ناۋقاس جانە كۆي-پنيەۆمونياسىمەن 43 339 جاعداي تىركەلدى. قىزىل ايماقتا 2 اۋماق: ولار سولتۇستىك قازاقستان جانە پاۆلودار وبلىستارى، – دەدى ول.

باس سانيتار دارىگەردىڭ ايتۋىنشا سوڭعى 2 اپتا ىشىندە كوروناۆيرۋس ينفەكسياسىمەن اۋىراتىندار 10% (11 باستاپ 24 قاراشاعا دەيىن – 9 410 جاعداي، 25 قاراشادان باستاپ 8 جەلتوقسانعا دەيىن – 10 802) جوعارىلاپ وتىر.

– تاۋەكەلى جوعارى وڭىرلەردە كۇشەيتىلگەن شارالار ساقتالدى. سىرقاتتانۋشىلىقتىڭ ءوسۋى جوق وڭىرلەردە بىرتىندەپ كارانتيندىك شارالاردى جەڭىلدەتۋ ەنگىزىلۋدە. مىسالى، ءبىرقاتار وڭىرلەردە اشىق ازىق-تۇلىك بازارلارىنىڭ قىزمەتىنە رۇقسات ەتىلگەن، ساۋدا-ويىن-ساۋىق ورتالىقتارىنىڭ جۇمىس ءتارتىبى وزگەردى. وسى رەتتە، بارلىق اۋماقتاردا كەز-كەلگەن ۇجىمدىق مەرەكەلەردى وتكىزۋگە تىيىم سالىنعان، – دەپ اتاپ ايتتى ول.

ەرلان قياسوۆ قازاقستاندىقتاردى ۇزاق دەمالىس كۇندەرى جانە جاڭا جىلدىق مەرەكەلەردىڭ جاقىنداعانىن ەسكەرە وتىرىپ، كوروناۆيرۋستىق ينفەكسيانىڭ الدىن-الۋ شارالارىن ساقتاۋعا شاقىردى.