قازاقستاندىق كاسىپكەر بولات وتەمۇراتوۆتىڭ اكتيۆتەرىنە شەكتەۋ شارالارىن قولدانۋ تۋرالى اعىلشىن سوتىنىڭ بۇيرىعى الىنىپ تاستالدى. بۇل تۋرالى "ۆەرنىي كاپيتال" كومپانياسى حابارلادى.
"بولات وتەمۇراتوۆ پەن بتا بانكىنىڭ وكىلدەرى اراسىنداعى كەلىسسوزدەر ناتيجەسىندە قۇپيا كەلىسىمگە قول قويىلدى، وعان سايكەس بانك ءوزىنىڭ تالاپ-ارىزىن قايتارىپ الۋعا مىندەتتەلدى. وسى كەلىسىم بويىنشا اعىلشىن سوتىنىڭ بولات وتەمۇراتوۆتىڭ اكتيۆتەرىنە شەكتەۋ شارالارىن قولدانۋ تۋرالى بۇيرىعى الىنىپ تاستالدى. ماڭىزدى قۇجاتتاردىڭ ءبىر بولىگى اتالعان كەلىسىمگە قول قويىلعانعا دەيىن ۇسىنىلدى. تاراپتار سونداي-اق بتا بانكىنىڭ ءوز اقشالاي قاراجاتىن قايتارۋ جونىندەگى شارالاردى ىسكە اسىرۋدا پايدالى بولۋى مۇمكىن كەز كەلگەن دەرەكتەرمەن الماسۋ ماسەلەسى بويىنشا ىنتىماقتاسۋعا ۋاعدالاستى" دەلىنگەن "ۆەرنىي كاپيتال" حابارلاماسىندا.
ەستەرىڭىزگە سالا كەتەيىك، 2015 جىلى مۇحتار ءابليازوۆ پەن ءىلياس حراپۋنوۆقا بتا بانكىنىڭ تالاپ ارىزى قويىلعان. ودان كەيىنگى سوتتالۋشىلار ءتىزىمىنىڭ كەڭەيۋىنە سايكەس، ونىڭ قۇرامىنا 2020 جىلدىڭ قاراشاسىندا بولات وتەمۇراتوۆ جانە ونىڭ بيزنەس قۇرىلىمىنا كىرەتىن ءبىرقاتار ادامدار قوسىلدى.
پىكىر قالدىرۋ