سەنات ءتوراعاسى ماۋلەن اشىمبايەۆ "Zeren" رەسپۋبليكالىق جاستار ءبىلىم بەرۋ لاگەرىنىڭ جۇمىسى اياسىندا جاستارمەن كەزدەستى.
تاۋەلسىزدىكتىڭ قادىر-قاسيەتىنە، ونى ساقتاۋدىڭ، ۇلتقا، وتانعا قىزمەت ەتۋدىڭ ماڭىزىنا توقتالعان ماۋلەن اشىمبايەۆ جەلتوقساننىڭ قازاق ءۇشىن قاستەرلى اي ەكەنىنە ەرەكشە نازار اۋداردى.
سونىمەن قاتار ول وسى ايدا قازاق جاستارى ەركىندىككە ۇمتىلعان 86-جىلعى جەلتوقسان وقيعاسى دا وتكەنىن تىلگە تيەك ەتتى.
– جەلتوقسان جاستارىنىڭ اسقاق رۋحى مەن ايبار مىنەزى ەگەمەندىككە جول اشىپ بەردى دەسەك، ارتىق بولا قويماس. جەلتوقسان ايىنىڭ العاشقى كۇنىنىڭ دە تاريحىمىزدا ماڭىزى ەرەكشە. سەبەبى، 1991 جىلدىڭ 1 جەلتوقسانىندا حالقىمىز تۇڭعىش پرەزيدەنتىن سايلادى. بابالارىمىز عاسىرلار بويى اڭساعان تاۋەلسىزدىگىمىزدى دە 1991 جىلدىڭ 16 جەلتوقسانىندا جاريالادىق، – دەگەن ماۋلەن اشىمبايەۆ 1997 جىلدىڭ 10 جەلتوقسانىندا ەلباسىنىڭ جارلىعىمەن اقمولاعا استانا مارتەبەسى بەرىلگەنىن اتاپ ءوتتى.
سونداي-اق سەنات ءتوراعاسى جاس بۋىننىڭ ساپالى ءبىلىم الۋ كەرەكتىگىن، العا بيىك ماقساتتار قويىپ، سوعان جەتۋ ءۇشىن تالپىنىپ، تالاپتانۋ قاجەتتىگىن اتاپ ءوتتى.
"Zeren" رەسپۋبليكالىق جاستار ءبىلىم بەرۋ لاگەرى 2018 جىلدان بەرى جۇمىس ىستەپ كەلەدى. لاگەردىڭ بيىلعى قورىتىندى كەزدەسۋى "جاڭا جاعدايداعى جاستار: ءىس-قيمىل كەزەڭى" تاقىرىبىنا ارنالدى. ءىس-شاراعا سەنات توراعاسىمەن بىرگە اقپارات جانە قوعامدىق دامۋ ءمينيسترى ايدا بالايەۆا، پرەزيدەنتتىك جاستار كادرلىق رەزەرۆىنىڭ مۇشەلەرى، جاستار بىرلەستىكتەرىنىڭ ليدەرلەرى، ۆولونتەرلار، "بولاشاق" ستيپەندياسىنىڭ يەگەرلەرى، كوللەدجدەر مەن جوعارى وقۋ ورىندارىنىڭ ستۋدەنتتەرى قاتىستى.
پىكىر قالدىرۋ