قازاقستاندا 2021 جىلدىڭ 1 قاڭتارىنان باستاپ مەملەكەتتىك ۇيىمداردىڭ 38،5 مىڭنان استام الەۋمەتتىك قىزمەتكەرىنىڭ جالاقىسى وسەدى. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگى حابارلادى.

مينيسترلىكتىڭ مالىمەتىنشە، بۇل ماقساتقا رەسپۋبليكالىق بيۋدجەتتەن الداعى ءۇش جىلعا شامامەن 95 ملرد تەڭگە بولىنەدى. 2021 جىلدىڭ 1 قاڭتارىنان باستاپ لاۋازىمدىق جالاقىنى ۇلعايتۋ جولىمەن الەۋمەتتىك قىزمەتكەرلەر ءۇشىن جالاقى 1،5 ەسەگە، 2022 جىلدىڭ 1 قاڭتارىنان باستاپ اعىمداعى ماننەن 1،75 ەسەگە، ال 2023 جىلى 2 ەسەگە وسەدى.

"جالاقىنى كوتەرۋ ءوز قىزمەتىن ستاسيونارلىق (قارتتار مەن مۇگەدەكتەرگە ارنالعان ۇيلەر) جانە جارتىلاي ستاسيونارلىق ۇلگىدەگى مەديسينالىق-الەۋمەتتىك مەكەمەلەردە (بۇدان ءارى – ءمام) (كۇندىز بولۋ بولىمشەلەرى، وڭالتۋ ورتالىقتارى)، ۋاقىتشا بولۋ مەكەمەلەرىندە (بەلگىلى ءبىر تۇرعىلىقتى جەرى جوق ادامدارعا، تۇرمىستىق زورلىق – زومبىلىق قۇرباندارىنا ارنالعان وڭالتۋ ورتالىقتارى) جۇزەگە اسىراتىن نەگىزگى پەرسونال (الەۋمەتتىك قىزمەتكەرلەر) مەن باسشى قۇرامعا، سونداي-اق ۇيدە قىزمەت كورسەتەتىن الەۋمەتتىك قىزمەتكەرلەرگە قاتىستى بولادى" دەلىنگەن مينيسترلىك تاراتقان حابارلامادا.

سونىمەن قاتار، ءمام اكىمشىلىك جانە كومەكشى قىزمەتكەرلەرىنىڭ جالاقىسىن لاۋازىمدىق جالاقىعا قوسىمشا اقىنى 30-دان 40%-عا دەيىن ارتتىرۋ ارقىلى كوتەرۋ جوسپارلانۋدا.

– بۇل جىل بارلىعىنا قيىن بولدى. ءبىزدىڭ الەۋمەتتىك قىزمەتكەرلەر مەكەمەلەردە ءىس جۇزىندە تۇردى، ەرەكشە كونتينگەنتپەن جۇمىس جاسادى. ءبىز ولاردىڭ ەڭبەگىن باعالايمىز جانە ولاردىڭ ماڭىزدىلىعىن تۇسىنەمىز. بۇل شارا الەۋمەتتىك سالاعا مامانداردى تارتۋعا، قىزمەتكەرلەردىڭ تاپشىلىعىن ازايتۋعا جانە كادرلىق جاعدايدى تۇراقتاندىرۋعا مۇمكىندىك بەرەدى دەپ ۇمىتتەنەمىز، – دەدى ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ.