بىرىككەن ۇلتتار ۇيىمىنىڭ (بۇۇ) وكىلى قازاقستاننىڭ تەرروريزمگە قارسى ءىس-قيمىلىنا جوعارى باعا بەرىپ وتىر. جۋىردا سىرتقى ىستەر ءمينيسترى مۇحتار تىلەۋبەردي بۇۇ باس حاتشىسىنىڭ ورىنباسارى – تەرروريزمگە قارسى ءىس-قيمىل ديرەكسياسىنىڭ باسشىسى ۆلاديمير ۆورونكوۆپەن بەينەكونفەرەنسيا ارقىلى كەلىسسوزدەر جۇرگىزدى.
كەزدەسۋ بارىسىندا تاراپتار تەرروريزمگە قارسى ءىس-قيمىل سالاسىنداعى ىنتىماقتاستىقتى دامىتۋ جوسپارلارىن، ونىڭ ىشىندە قازاقستاننىڭ باستاماسىمەن جاسالعان تەرروريزمنەن ازات الەمگە جەتۋ، سونداي-اق اسكەري قاقتىعىستار ايماقتارىنان ورالعان ازاماتتاردى، ەڭ الدىمەن بالالاردى وڭالتۋ جانە رەينتەگراسيالاۋ بويىنشا الدىڭعى قاتارلى قازاقستاندىق تاجىريبەنى ناسيحاتتاۋعا باعىتتالعان بىرلەسكەن جوبالاردى جۇزەگە اسىرۋ ءۇشىن ادەپ كودەكسىن ىلگەرىلەتۋدى تالقىلاعان بولاتىن.
بۇۇ وكىلى ءبىزدىڭ ەلىمىزدىڭ حالىقارالىق تەرروريزمگە قارسى ءىس-قيمىل سالاسىنداعى قىزمەتىن جانە سيريا مەن يراكتان ازاماتتارىمىزدىڭ ورالۋى بويىنشا «جۋسان» جانە «رۋسافا» گۋمانيتارلىق وپەراسيالارىنىڭ ناتيجەلەرىن جوعارى باعالادى.
قازاقستان بۇۇ-نىڭ ورتالىق ازياداعى تەرروريزمگە قارسى جاھاندىق ستراتەگياسىن ىسكە اسىرۋ جانە بۇۇ-نىڭ الماتى حابىنىڭ نەگىزىندە ايماقتىق ىنتىماقتاستىقتى نىعايتۋ جونىندەگى ايماقتىق ءىس-شارالار جوسپارىنىڭ ءتورتىنشى كەزەڭىن ازىرلەۋگە جانە ىسكە اسىرۋعا بەلسەندى قاتىسۋعا نيەتتى ەكەنىن ءبىلدىردى.
قازاقستان تەرروريزمگە قاتىسى بار دەگەن كۇدىكپەن ءوز ازاماتتارىن سيريا مەن يراكتاعى قاقتىعىس ايماقتارىنان ءبىرىنشى بولىپ قايتارعان ەلدەردىڭ قاتارىندا. ازاماتتاردىڭ كوپشىلىگى ايەلدەر مەن بالالار، ءبىراق ورالعاندار اراسىندا تەرروريستىك توپتاردىڭ مۇشەلەرى، ونىڭ ىشىندە كىسى ولتىرۋشىلەر مەن جازالاۋشىلار دا بار. بۇۇ باس اسسامبلەيانىڭ 75ء-شى سەسسياسى اياسىندا وتكىزىلگەن ءىس-شارا بارىسىندا قازاقستان دا ءوز تاجىريبەسىمەن ءبولىستى.
ەركەجان ارىن
پىكىر قالدىرۋ