فرانسيا ارا-تۇرا تاۋلى قاراباق ماسەلەسى بويىنشا انكاراعا حابارلاسۋعا تىرىستى، ءبىراق انكارا بۇعان رەاكسيا بىلدىرمەدى. سەبەبى ول ءپاريجدىڭ شىنايى ماقساتتارىن جاقسى بىلەدى. بۇل تۋرالى تۇركيا پرەزيدەنتى رەجەپ تايىپ ەردوعان ازەربايجاندىق ارىپتەسى يلحام الييەۆپەن كەلىسسوزدەردەن كەيىنگى بىرلەسكەن باسپا ءسوز ءماسليحاتىندا مالىمدەدى.

ەردوعان تاعى دا ازەربايجان حالقىن جانە پرەزيدەنت الييەۆتى قاراباح سوعىسىنداعى جەڭىسىمەن قۇتتىقتادى.

– وسى 44 كۇندىك سوعىستاعى جەڭىس تەك باۋىرلاس ازەربايجان ءۇشىن عانا ەمەس، بۇكىل تۇركيا ءۇشىن قۋانىش. تۇركيا مەن ونىڭ تۇرعىندارى ارميان حالقىنا كەك ساقتامايدى. ءبىراق بارلىق ماسەلە ارمەنيا باسشىلىعىنا بايلانىستى. ەگەر ەريەۆان انكاراعا وڭ قادامدار جاساسا، ءبىز شەكارانى اشامىز. كورشىلەس ەلمەن شەكارانى ءبىرجولا جاۋىپ تاستاعىمىز كەلمەيدى، – دەدى تۇركيا پرەزيدەنتى رەجەپ تايىپ ەردوعان.

ول بۇگىندە تۇركيادا 100 مىڭنان استام ارميان ازاماتى جۇمىس ىستەيتىندىگىنە نازار اۋداردى.

بۇعان دەيىن ازەربايجان استاناسى باكۋدە ازەربايجان مەن تۇركيا پرەزيدەنتتەرى يلحام الييەۆ پەن رەجەپ تايىپ ەردوعان قاتىسقان جەڭىس شەرۋى ءوتتى. قالانىڭ ورتالىعىنا جەرىن ازات ەتۋ كەزىندە جارالانعان وفيسەرلەر مەن اسكەريلەر، ارداگەرلەردىڭ ءبارى كەلدى. جالپى شەرۋگە 3000-نان استام ادام قاتىستى. بۇل كۇندە 150-گە جۋىق اسكەري تەحنيكا، ونىڭ ىشىندە جاڭادان قابىلدانعان زاماناۋي اسكەري تەحنيكالار، زىمىراندىق جانە ارتيللەريالىق قوندىرعىلار، اۋە شابۋىلىنا قارسى قورعانىس جۇيەلەرى، سونداي-اق اسكەري كەمەلەر مەن كاتەرلەر كورسەتىلدى.