قۇرمەتتى قاسىم-جومارت كەمەل ۇلى!
تاۋەلسىزدىكتەن كەيىن ەلباسى نۇرسۇلتان ءابىش ۇلى باستاعان قازاق كوشى مۇلدەم توقتادى دەپ ايتۋعا بولادى. قازىرگى ۋاقىتتا تار جول، تايعاق كەشۋدى باسىپ كەلگەن شەتەل قازاعى ءوز وتانىنىڭ شەكاراسىنان وتە الماي كەرى قايتىپ جاتىر. بۇعان تەك الەمدى جاۋلاعان پاندەميا اسەر ەتىپ وتىر دەسەك قاتەلەسەمىز. سىزگە تۇسىنىكتى بولۋى ءۇشىن قىسقا عانا جازۋدى ءجون كورىپ وتىرمىن.
- ءوزىڭىز جاقسى بىلەتىن جۇڭگو ەلى زاڭدى بۇزعان، سوتتالعان ازاماتتارعا شەتەل اسۋعا ارنالعان پاسپورت بەرمەيدى.
- قازاق ەلىنىڭ قىتايدا ورنالاسقان ۆيزالىق قىزمەتى دە قازاقستاندا زاڭ بۇزعان نەمەسە كىرۋگە تىيىم سالعان ازاماتتارعا ۆيزا بەرمەيدى.
- ارنايى زەرتحانالار Covid-19 سىناعىندا وڭ ناتيجە كورسەتكەندەرگە پسر تەستىن تەرىس ناتيجەمەن بەرمەك تۇگىلى سول ۋاقىتتا كارانتينگە جاتقىزىپ نەمەسە ارناۋلى ەمحانالارعا ورنالاستىرادى.
ەندەشە، قولىندا قىتايدىڭ زاڭدى پاسپورتى، قازاقستاننىڭ زاڭدى ۆيزاسى، پسر تەستى تەرىس ناتيجەسىنىڭ انىقتاماسى بولا تۇرا قازاق شەكاراسىنان كىرە الماعان شەتەل قازاعىنا نە بەتىمىزبەن جاۋاپ بەرمەكپىز؟! ەستۋىمىزشە، وتانىنا ورالعىسى كەلگەن قازاق ۆەدومستۆوارالىق كوميسسيانىڭ بەكىتكەن «ارنايى تىزىمىنە» ەنۋى كەرەك ەكەن. ول قانداي كوميسسيا؟ ول قانداي ءتىزىم؟ تۇسىندىرەتىن ءبىر پەندە جوق.
ءبىزدىڭ انىقتاۋىمىزشا، بۇعان پرەمەر-مينيستردىڭ ورىنباسارى جاۋاپتى كورىنەدى. ءتىپتى شەكارادان كىرۋگە رۇقسات بەرەتىن تىزىمگە كىرۋگە كومەك كورسەتەتىن دەلدالداردىڭ بارىن قۇلاعىمىز شالدى. باسقاسى باسقا وسىناۋ قيىن قىستاۋ كەزەڭدە ءوز وتانىنا ورالعىسى كەلگەن، ءوزىڭىز «قانداس» دەپ اتاۋعا پارمەن بەرگەن باۋىرلارىمىزدىڭ شەكارادان وتە الماۋى الەم الدىندا ماسقارالىق ەمەس پە؟! كەشە عانا قازاق شەكاراسىنان كەرى قايتقان قازاقتار ماسەلەسى تۋرالى «قامشى» پورتالى ارنايى ماقالا جاريالاپ، دۇنيەجۇزى قازاقتارى قاۋىمداستىعى – «وتانداستار قورىنىڭ» ارالاسۋىمەن ولاردىڭ قايتا ورالۋىنا مۇرىندىق بولعان ەدى. قيىندىققا ۇشىراعان ازاماتتىڭ تۋىسىنان ەستۋىمىزشە، جۇڭگو تاراپى ولاردىڭ وزدەرىنە ەسكەرتۋ جاساپتى. «ءبىز قولىنا زاڭدى پاسپورت بەردىك، ۆيزاسى بويىنشا شەكارادان شىعاردىق. قابىلداماي قويعان ءوز وتاندارىڭىز. ەندەشە نەگە جۇڭگو تاراپىن كىنالاۋ سيپاتىنداعى ماقالا جاريالانعان» دەپ ءوز پىكىرلەرىن ايتىپتى. ورىندى. ايتارعا ءسوز جوق. سونداي-اق اتالعان ماقالا شىعىسىمەن رەداكسياعا اقش-تىڭ الماتىداعى كونسۋلدىعىنان حابارلاسىپ، قازاقستان شەكاراشىلارى كەرى قايتارىپ جىبەرگەن قانداستار تۋرالى اقپارات سۇرادى. دەمەك ءوز ىشىمىزدە-اق ىڭ-شىڭسىز رەتتەۋگە بولاتىن جاعدايدىڭ شۋى جۇڭگو مەن امەريكاعا دەيىن جەتۋىنە جول بەرىپ قويدىق. بۇل – ەلدىگىمىزگە، مەملەكەتتىگىمىزگە سىن!
پرەزيدەنت قاسىم-جومارت كەمەل ۇلى!
قىتايداعى قازىرگى جاعدايدى بىزدەن گورى ءسىز ارتىق بىلەسىز دەسەك قاتەلەسپەسپىز. سوڭعى 2-3 جىلدا قازاق كوشى تۇرالاپ، وعان الەمدىك پاندەميا قوسىلىپ، اسىرەسە جۇڭگو قازاعىنىڭ وتانىنا ورالۋى مۇلدەم مۇمكىن ەمەس جاعدايعا جەتتى. ءبولىنىپ-جارىلعان تۋىس تۋعاندار، ەرلى-زايىپتىلار، ۇيلەنبەكشى بولعان جاستار ەكى جاقتا قالىپ، بەيبىت زاماننىڭ تارشىلىعىن تارتىپ وتىر. وسىنداي قيىن كەزەڭدە 3-4 مەملەكەتتىڭ شەكاراسىن اتتاپ، ارەڭ دەگەندە وتان توپىراعىن باستىم-اۋ دەگەندە ءبىزدىڭ شەكاراشىلار كەۋدەسىنەن يتەرىپ كەرى قايتارۋدى ادەتكە اينالدىردى. قانداستارىمىزدىڭ بىرنەشە مەملەكەتتى اتتاپ، وتانىنا ارەڭ ورالعانىن، ولاردى كەرى قايتارعاندا قىتايدا نە كۇتىپ تۇرعانىن ءبىزدىڭ شەكارا قىزمەتى مۇلدەم قاپەرىنە المايدى.
قۇرمەتتى قاسىم-جومارت كەمەل ۇلى!
تاۋەلسىزدىكتەن كەيىنگى «قازاق كوشى» ەلباسى نۇرسۇلتان نازاربايەۆتىڭ الەم الدىنداعى، تاريح الدىنداعى «ۇلت كوشباسشىسى» رەتىندە جاساعان ەڭ ۇلى ەڭبەگى دەسەك ارتىق ايتقاندىق بولماس. ال سول «ۇلى كوشتىڭ» ەلدى ءسىز باسقارعان كەزەڭدە دۇنيەجۇزىنە «ماسقارا» بولاتىن دەڭگەيدە تۇرالاپ قالۋىن بۇكىل قازاق قالامايتىنى انىق. شەكارا قىزمەتىنىڭ گەنەرالى دارحان ديلمانوۆ مىرزانىڭ وسى ماسەلەدە كەيبىر تۇيتكىلدىڭ شەشىلۋىنە وڭ ىقپال ەتىپ وتىرعانىنان حاباردارمىز. دەگەنمەن بۇل ءبىر قازاقتىڭ عانا ەمەس بارشا الاش جۇرتىن الاڭداتاتىن ماسەلەگە اينالعانى انىق. سوندىقتان وسى ماسەلەنى ءوزىڭىز تىكەلەي باقىلاۋىڭىزعا الىپ، تۇبەگەيلى وڭ شەشىلۋىنە ىقپال ەتۋىڭىزدى سۇرايمىز!
وسى حاتتى تەك «قامشى» پورتالىندا عانا ەمەس، پرەزيدەنت اكىمشىلىگىنە رەسمي جولدايتىنىمىزدى جانە رەسمي جاۋاپ كۇتەتىنىمىزدى حابارلايمىز.
قۇرمەتپەن، «قامشى» اقپارات اگەنتتىگىنىڭ جەتەكشىسى ءبىلال قۋانىش
پىكىر قالدىرۋ