ماسەلەن، بۇگىن "اق جول" پارتياسىنىڭ وكىلدەرى الماتىداعى سۋسىن وندىرەتىن زاۋىت ۇجىمىمەن كەزدەستى.

بۇل زاۋىت پاندەميا سالقىنىن سونشالىق سەزە قويماعان. ويتكەنى، وندىستە ازىق-تۇلىككە دەگەن سۇرانىس ازايماعان، دەپ حابارلادى "اق جول" پارتياسىنىڭ باسپا ءسوز قىزمەتى.

وندىرىستە  جىلىنا 60 ميلليون ليتر سۋسىن وندىرىلەدى. اينالىمداعى اقشانىڭ كولەمى دە اۋقىمدى. سوندىقتان زاۋىتتاعى 200-دەن اسا قىزمەتكەر جۇمىس ورنىن ساقتاپ قالعان. ەندىگى ماسەلە ولاردىڭ الەۋمەتتىك جاعدايىن جاقسارتىپ، بارىنشا قولايلى ورتا قالىپتاستىرۋ. بۇعان قوسا، كەزدەسۋ بارىسىندا قولجەتىمدى باسپانا، ساپالى مەديسينا جانە ءبىلىم جۇيەسىنە قاتىستى ماسەلەلەر دە كوتەرىلدى.

پارلامەنت ءماجىلىسى دەپۋتاتتىعىنا ۇمىتكەر دميتريي ۆاسيليەۆتىڭ پىكىرىنشە، مۇنداي كاسىپورىندار وتاندىق ءونىم شىعارىپ، ەل ەكونوميكاسىن دامىتۋعا ۇلكەن ۇلەس قوسىپ جاتىر. سايكەسىنشە، مۇنداي وندىرىستەردىڭ جۇمىسشىلارىنا  جايلى جاعداي جاسالۋى كەرەك. «اقجول» پارتياسىنىڭ وكىلدەرى الداعى كۇندەرى دە وسىنداي ەلىمىزدەگى ءىرىلى-ۇساقتى ءوندىرىس وشاقتارىن ارالاپ كورمەك.

ال "اۋىل" پارتياسى بۇگىن تۇركىستان وبلىسى قازىعۇرت تاۋىنىڭ ەتەگىندەگى "كەمە قالعان" الاڭىندا "اۋىلدىقتار اتقا قوندى، قولدايىق!"  اتتى اكسياسى وتكىزىپ، قازاقستان رەسپۋبليكاسى پارلامەنتى ءماجىلىسى مەن ءماسليحات دەپۋتاتتارىن سايلاۋ ناۋقانىنىڭ سيمۆوليكالىق تۇردە باستالعانىن حابارلادى.

ءىس-شاراعا ءماجىلىس دەپۋتاتتىعىنا كانديداتتار: ت.س.راحيمبەكوۆ، ك. ك. ايتۋعانوۆ، ب. تولەگەن، ز. ا. الىپبەكوۆ، د. كاپ ۇلى، ك. ا. ارالبەكوۆا،  ن. گ. ارسيۋتين، ا. ا. ساتىبالدين، د. ك. قۋاتوۆ جانە ب. د. قىستاۋوۆ قاتىستى.

– اڭىز بويىنشا، ادامزاتتى سۋ تاسقىنىنان قۇتقارعان نۇح كەمەسى وسى جەرگە توقتادى. ادامزات بالاسىنىڭ ءوسىپ-ونۋى ءدال وسى جەردەن باستاۋ الادى. سوندىقتان قاسيەتتى قازىعۇرت جەرىن جاڭعىرۋ جانە جاڭارۋ مەكەنى دەپ اتاۋعا بولادى. سول سەبەپتى "اۋىل" پارتياسى ءوزىنىڭ ۇگىت-ناسيحات ناۋقانىن وسى جەردەن باستاۋدى ۇيعاردى. 

"اتقا قونۋ" ۇعىمى  حالقىمزدىڭ مۇددەلەرىن قورعاۋ ءۇشىن كۇش جۇمىلدىرۋدى بىلدىرەدى. اتقا قونعاندار جاقسىلىقتىڭ جارشىسى، پارتيانىڭ جوسپارلارى مەن ۇسىنىستارىنىڭ حابارشىسى بولادى. سوندىقتان بارلىق كانديداتتاردىڭ ءبىرىنشى كەزەكتەگى مىندەتى پارتيانىڭ سايلاۋالدى باعدارلاماسىن ءاربىر اۋىلعا، ءاربىر قازاقستاندىققا جەتكىزۋ" – دەپ اتاپ ءوتتى ءا. بەكتايەۆ.

سونداي-اق وسى كۇنى الداعى سايلاۋعا قاتىساتىن، جۋىرداعا عانا رەبرەندينگ جاساعان قازاقستان حالىق پارتياسى سايلاۋالدى شتابىن تانىستىردى.

قحپ ءتوراعاسى، قازاقستان حالىق پارتياسى پارلامەنتتىك فراكسياسىنىڭ جەتەكشىسى، ءماجىلىس دەپۋتاتى ايقىن قوڭىروۆ جۋرناليستەرگە پارتيانىڭ نەگىزگى يدەيالارىن باياندادى.

– ساياسي دودانىڭ ماڭىزدى كەزەڭى باستالدى، – دەدى ايقىن قوڭىروۆ.

قحپ وك حاتشىسى، ءماجىلىس دەپۋتاتى جامبىل احمەتبەكوۆ پەن قحپ رەسپۋبليكالىق سايلاۋالدى شتابىنىڭ باسشىسى ولجاس سىزدىقوۆ وڭىرلەردە جۇرگىزىلىپ جاتقان جۇمىستار تۋرالى باياندادى. ءماجىلىس پەن ءماسليحاتتارعا كانديداتتاردىڭ قالاي ىرىكتەلگەنىن ءتۇسىندىردى.

– قازاقستاننىڭ ءار وڭىرىندە پارتيانىڭ قالالىق جانە وبلىستىق فيليالدارى جۇمىس ىستەيدى. ولاردىڭ ءبارى جەرگىلىكتى حالىقپەن تىعىز بايلانىستا. سايلاۋ كۇنى جاريالانعان سوڭ قحپ دا دايىندىقتى ۇدەتتى. وبلىستىق، قالالىق فيليالداردىڭ بازاسىندا سايلاۋالدى شتابتار ۇيىمداستىرىلدى. ۇگىت-ناسيحات جۇمىستارىنا دايىندىق بارىسى پىسىقتالدى، – دەدى ولجاس سىزدىقوۆ.

سايلاۋ الدىندا اتاۋى وزگەرگەن تاعى ءبىر پارتيا – "ADAL" پارتياسى دەپۋتاتتىققا ۇمىتكەرلەردىڭ ايماقتارداعى تۇرعىندارمەن كەزدەسۋلەرى باستالعانىن جاريا ەتتى.