شىعىس قازاقستان وبلىسىنىڭ اكىمى دانيال احمەتوۆ تۇرعىنداردى سانيتارلىق-ەپيدەميولوگيالىق تالاپتاردى قاتاڭ ساقتاۋعا شاقىردى. بۇل تۋرالى ول الەۋمەتتىك جەلىدەگى پاراقشاسىندا جازدى.
– جارتى اي بويى ءبىزدىڭ وبلىس كارانتيندىك ءىس-شارالاردىڭ "سارى" ايماعىندا كەلەدى. سوڭعى ون بەس كۇندە توسەك قورىنىڭ قامتىلۋ پايىزى 14،5-تەن 11،3%-عا دەيىن تومەندەدى، ال R رەپرودۋكتيۆتى سانى 0،84 دەڭگەيىندە ساقتالۋدا، – دەدى ول.
ونىڭ ايتۋىنشا، شقو-داعى شاعىن جانە ورتا بيزنەس ادەتتەگى جۇمىس تارتىبىنە قايتا ورالۋدا.
– شقو اۋماعىندا ورنالاسقان ازىق-تۇلىك جانە ازىق-تۇلىك ەمەس تاۋارلاردىڭ ساۋدا وبەكتىلەرىنە، ياعني بارلىق تۇردەگى بازارلارعا، سونداي-اق سۋپەر جانە گيپەرماركەتتەرگە، ساۋدا ۇيلەرىنە، ساۋدا-ويىن ورتالىقتارىنا مەرەكە كۇندەرى، ياعني 16-19 جەلتوقسان ارالىعىندا جۇمىس ىستەۋگە رۇقسات بەرىلدى. ارينە، تىعىزدىعىنا بايلانىستى بارلىق تالاپتار ساقتالۋعا ءتيىس. دەمالىستان (جەكسەنبىدەن) باسقا كۇندەرى سپورت نىساندارى، مۇز ايدىندارى، مونشالار مەن باسسەيندەردىڭ سپا-ورتالىقتارى دا ءوز جۇمىسىن قاتاڭ تۇردە الدىن الا جازىلۋ ءتارتىبىن ورىنداي وتىرىپ جالعاستىرادى. سونداي-اق بالالاردى وڭالتۋ جانە ءبىلىم بەرۋ ورتالىقتارى، مادەنيەت وبەكتىلەرى، كىتاپحانالار، مۇراجايلار، بيزنەس-ورتالىقتار جانە سۇلۋلىق سالوندارى قاۋلىدا بەلگىلەنگەن شەكتەۋلەرگە سايكەس قىزمەتىن جۇزەگە اسىرادى، – دەپ اتاپ ءوتتى ءوڭىر باسشىسى.
ول جەلىدەگى جازباسىندا دارىگەرلەر ادام كوپ جينالۋى ىقتيمال كەز كەلگەن شارادان باس تارتۋدى ۇسىنعانىن جەتكىزدى.
ول قوعامدىق تاماقتانۋ ورىندارىندا جاپپاي، وتباسىلىق، ۇجىمدىق مەرەكەلەر وتكىزۋگە تىيىم سالىنعانىن ايتتى.
– بالالار ويىن الاڭدارى مەن اتتراكسيوندارىنىڭ قىزمەتىنە تىيىم سالىندى. ساۋدا-ويىن ورتالىقتارىنداعى قوعامدىق تاماقتانۋ وبەكتىلەرىنە ءونىمدى وزىمەن الىپ كەتۋ، نە جەتكىزۋ ارقىلى جۇزەگە اسىرۋلارىنا رۇقسات ەتىلەدى، – دەدى د.احمەتوۆ.
