2020 جىلعى 16 جەلتوقساندا الماتى قالاسى تاۋەلسىزدىك مونۋمەنتىنىڭ جانە جەلتوقسان قۇرباندارىنا ارنالعان ەسكەرتكىشتىڭ الدىندا ءۇش جۇزگە تارتا ادام جينالدى. الاڭعا كەلگەندەر 1986 جىلعى جەلتوقسان كوتەرىلىسى مەن 2011 جىلعا جاڭاوزەندەگى مۇنايشىلار نارازىلىعى قۇرباندارىن ەسكە الىپ، ارتىنشا نارازىلىق اكسياسىن وتكىزدى.
جينالعاندار الدىمەن قۇرباندارعا قۇران باعىشتاپ، گۇل شوقتارىن قويدى. ارتىنشا كەزەك-كەزەك ءسوز ءسوز الىپ، تالاپتارىن جەتكىزدى. تىركەلمەگەن "دەموكراتيالىق پارتيا" جەتەكشىسى جانبولات ماماي "بۇگىن توي تويلايتىن كۇن ەمەس، قاسىرەتتى كۇن" ەكەنىن ايتتى.
– جەلتوقسان مەن جاڭاوزەن بوزداقتارىن ەسكە الۋعا كەلگەندەرىڭىزگە راقمەت. تاۋەلسىزدىك قانمەن كەلگەن. تاۋەلسىزدىك اسپاننان سالبىراپ تۇسكەن جوق، ونى نازاربايەۆ الىپ كەلگەن جوق. ول كەرىسىنشە تاۋەلسىزدىكتى جاريالاماي قاشىپ ءجۇردى. قازاقستاندى ەڭ سوڭعى مەملەكەت ەتىپ مويىنداتتى. وسى جەردە جەلتوقسانشى اعا-اپكەلەرىمىز بار، بارىنە راقمەت. ءبىراق سول جەلتوقسانشىلاردىڭ اراسىندا بيلىكتىڭ سويىلىن سوعىپ جۇرگەندەر دە بار، –دەدى ماماي.
الاڭدا "دەمپارتيامەن" قاتار وزدەرىن "جەلتوقسانشىلارمىز" دەپ تانىستىرعاندار جانە "Oyan Qazaqstan" قوزعالىسىنىڭ بەلسەندىلەرى دە بولدى. قولدارىنا تۋ الىپ شىققانداردى ارنايى جاساق قورشاپ تۇردى.
جينالعاندار "ۆىۆورى 2021"، "ءقازىر بولماسا قاشان؟"، "1986 ۇمىتىلماس 2011"، "تاعى قانشا ۇرپاق جۇيە قۇربانى بولادى؟"، "نۇرسۇلتان، وتانىمدى جەمە" سەكىلدى ۇراندار جازىلعان پلاكات ۇستاپ شىقتى.
تاۋەلسىزدىك الاڭىنا جينالعاندارعا قۇزىرلى ورگان وكىلدەرى اكسيانىڭ "رۇقسات ەتىلمەگەنىن" ەسكەرتىپ تاراۋلارىن سۇرادى. جينالعان توپ رۇقسات سۇرامايتىنىن، تەك ەسكەرتەتىنىن مالىمدەدى. ارنايى جاساق 300-گە تارتا ادامنىڭ ەشقايسىسىن ۇستامادى. ساعات 15:00-دەن كەيىن جينالعان توپ تاراي باستادى.
پىكىر قالدىرۋ