14 جەلتوقساندا نۇر-سۇلتان قالاسىندا «اقىندار اۋىلدى جىرلايدى» اتتى ادەبي-پوەتيكالىق كەشى ءوتتى. 

اتالعان شاراعا «اۋىل» حالىقتىق-دەموكراتيالىق پاتريوتتىق پارتياسىنىڭ ءتوراعاسى ءالي بەكتايەۆ، قازاقستان رەسپۋبليكاسى پارلامەنتى ءماجىلىسىنىڭ دەپۋتاتتىعىنا كانديداتتار داۋلەتكەرەي كاپ ۇلى مەن زەيءىن الىپبەك قاتىستى.

سونداي-اق رۋحاني كەشكە پارتيانىڭ 2017 جىلدان بەرى جىل سايىن وتكىزىپ كەلە جاتقان «اۋىلىم - التىن تۇعىرىم» ونلاين-بايقاۋىنىڭ جەڭىمپازدارى مەن قاتىسۋشىلارى دا جينالدى.

اتالعان بايقاۋدىڭ باستى ماقساتى - ۇلتتىق قۇندىلىقتاردى دارىپتەۋ جانە اۋىلدىڭ رۋحاني ءومىرىن، تىنىس-تىرشىلىگىن، اۋىلدا بولىپ جاتقان الەۋمەتتىك-ەكونوميكالىق پروسەستەردى سيپاتتاۋ ارقىلى ۇلتتىق قۇندىلىقتاردى ناسيحاتتاۋ.

كەش بارىسىندا ءسوز العان پارتيا ءتوراعاسى ءالي بەكتايەۆ:

«اۋىل تاقىرىبى – ەشقاشان تاۋسىلمايتىن، ەش شەكاراسى جوق، ەشتەڭەمەن شەكتەلمەيتىن كۇردەلى تاقىرىپ ەكەنىنە كوزىمىز جەتە ءتۇستى. اۋىلدىڭ قاسيەتى مەن كيەسىن كورسەتۋدىڭ جاقسى ءبىر جولى – ادەبي كونكۋرستار ارقىلى دارىپتەۋ ەكەنى بەلگىلى. اۋىل تاقىرىبىن ءسوز ەتكەن ەڭ مىقتى شىعارمالارعا ونلاين بايقاۋ جاريالادىق. پوەزيا، پروزا، دراما دانرلارى بويىنشا وتكەن بايقاۋعا ەلگە تانىمال اقىن-جازۋشىلار قازىلىق ەتءتى. بۇل يگى باستاما داستۇرگە اينالىپ، جىل سايىن وتكىزىلىپ كەلەدى. سول ارقىلى ەل اراسىنان قانشاما مىقتى جاس تالانتتار جارىققا شىقتى»، - دەپ اتاپ ءوتتى.

ال «ADAL» پارتياسىنان ءماجىلىس دەپۋتاتتىعىنا كانديداتتار 14 جەلتوقسان كۇنى كەزدەسۋ وتكىزدى. كەزدەسۋ بارىسىندا پارتيانىڭ ەكونوميكالىق سەكتورلارىن دامىتۋدىڭ جاڭا يدەيالارى، حالىقتىڭ ءارتۇرلى ساناتتارىن قولداۋ جونىندەگى ۇسىنىستارى، كوپشىلىكتى تولعاندىراتىن وزەكتى پروبلەمالار قاراستىرىلدى.

ماسەلەن، شىدەرتى اۋىلىندا بولعان ولجاس وردابايەۆ پەن اقمارال بەكمىرزايەۆا باعدارلامانىڭ نەگىزگى تارماقتارىن كورسەتىپ، پارتيانىڭ جالپى يدەولوگياسى مەن قۇندىلىقتارى تۋرالى ءسوز قوزعادى.

اۋىل تۇرعىندارى ناۋقاستاردىڭ دارى-دارمەكپەن ۋاقىتىلى قامتاماسىز ەتىلمەۋى، سونداي-اق جايىلىمدىق جەردىڭ جوقتىعى سىندى بىرنەشە ماسەلەمەن شاعىمداندى.

ولجاس وردابايەۆ بۇل ماسەلەلەر پارتيانىڭ باقىلاۋىنا الىناتىندىعىنا سەندىردى.

ەكىباستۇز قالاسى تۇرعىندارىنىڭ اراسىندا پروبلەمالى نەسيەلەرى بار كاسىپكەرلەر كوپ ەكەن. اقمارال بەكمىرزايەۆا پارتيانىڭ وسىنداي نەسيەلەرگە جاپپاي راقىمشىلىق جاساۋ تۋرالى ۇسىنىسى تۋرالى ايتتى.

كەزدەسۋدە ولجاس وردابايەۆ ەلىمىزدىڭ ءاربىر تۇرعىنى پارتيانىڭ ۆەب-سايتى ارقىلى كەز-كەلگەن ايماقتى دامىتۋ بويىنشا ءوز ۇسىنىستارىن ەنگىزۋگە، ەلدى مەكەندەردىڭ بيۋدجەتتەرى تۋرالى اقپارات الۋعا جانە ت.ب. مۇمكىندىكتەرى بار ەكەنىن جەتكىزدى.

پارتيا مۇشەسى ارداق نازاروۆ تاراز قالاسىنداداعى "تاراز-عاسىر" كوللەدجىندە جاستارمەن كەزدەسۋ وتكىزدى. ارداق نازاروۆ ءوزى تۋرالى، بالالىق شاعى، سپورتتىق مانسابىن قالاي باستاعانى تۋرالى ايتىپ بەردى.

"بالا كەزىمىزدە ءبىز جاقسى جاعدايدا ءومىر سۇرمەگەنىمىزگە قاراماستان، مەن سىنعان جوقپىن، جامان جولمەن جۇرمەدىم. مەنىڭشە، بۇل ماڭىزدى. ەڭبەكقور بولۋ ماڭىزدى. تەك ەڭبەك ارقىلى عانا تابىس پەن مولشىلىققا قول جەتكىزۋگە بولادى"، - دەپ اتاپ ءوتتى ول.

الماتىدا قازاقستان حالىق پارتياسىنىڭ وكىلدەرى قالاداعى ورتا مەكتەپتەردىڭ، سونداي-اق كوللەدجدەر مەن جوعارى وقۋ ورىندارىنىڭ پەداگوگتارى جانە وقىتۋشىلارىمەن كەزدەستى.

قحپ وكىلدەرى قازاقستانداعى ءبىلىم بەرۋدىڭ نەگىزگى پروبلەماسى – ونىڭ قولجەتىمسىزدىگى ەكەنىن اتاپ ايتتى. ولاردىڭ پىكىرىنشە، تەوريالىق تۇرعىدان العاندا ءبىزدىڭ ەلدە بارلىعىنا تەگىن ورتا بىلىمگە كەپىلدىك بەرىلگەن. الايدا كەي جەرلەردە ساپالى ءبىلىم تەك ەليتا وكىلدەرىنە عانا ارنالعانداي. 

– مەيلى ول قالادا نەمەسە اۋىلدا تۇرسىن، ءار بالا، مەكتەپتىڭ ءار تۇلەگى وزدەرى قالاعان بىلىمگە قول جەتكىزۋى كەرەك، – دەدى قحپ الماتى قالالىق فيليالىنىڭ جەتەكشىسى الىبەك شاپەنوۆ. 

قحپ جاعدايدى جاقسارتۋ ءۇشىن نە ۇسىنىپ وتىر؟ ەڭ الدىمەن ءبىلىم بەرۋدى ساپالى، تەگىن جانە ەل حالقىنىڭ بارلىق ساناتتارى ءۇشىن قولجەتىمدى ەتۋ كەرەك.

– ءبىلىم بەرۋ – مەملەكەتتىڭ جۇيە قۇراۋشى ينستيتۋتى. ساپالى جانە قولجەتىمدى بىلىمگە ينۆەستيسيا قۇيۋ – بۇل قازاقستاننىڭ ادامي كاپيتالىنا قۇيىلعان ينۆەستيسيا، – دەيدى پارتيالىقتار.

​«اق جول» پارتياسىنىڭ كانديداتتارى شىمكەنت قالاسىنداعى «مەديكەر» مەديسينالىق بىرلەستىگى ۇجىمىمەن كەزدەستى. كەزدەسۋگە مەديسينالىق مەكەمەنىڭ دارىگەرلەرى، قالا جاستارى، پارتيا مۇشەلەرى مەن كاسىپكەرلەر قاتىستى.

جيىندا «اق جول» پارتياسى شىمكەنت فيليالىنان قازاقستان رەسپۋبليكاسى پارلامەنت ءماجىلىسى دەپۋتاتتىعىنا ۇمىتكەر تۇران ءابجانوۆ پارتيانىڭ سايلاۋالدى باعدارلاماسىمەن تانىستىردى.

​- بيىل ەلىمىزدە جايلاعان COVID-19 ىندەتىمەن جان اياماي كۇرەسكەن سىزدەرگە العىس ءبىلدىرەمىن. وزدەرىڭىز بىلەسىزدەر «اق جول» پارتياسى ەپيدەميانى ەسكەرە وتىرىپ، دارىگەر مەن مەديسينا قىزمەتكەرىنىڭ ماتەريالدىق جاعدايىن قامتاماسىز ەتۋ، سونداي-اق اق حالاتتى جانداردىڭ كاسىبي جانە ادامي قاسيەتتەرىن قورعاۋ ءۇشىن  ولاردىڭ مارتەبەسى تۋرالى زاڭدى ازىرلەۋدى ۇسىندى. سىزدەردىڭ ەڭبەكتەرىڭىزدى ءبىز ءارقاشان باعالايمىز جانە قۇرمەتتەيمىز، - دەدى تۇران ءالىمحان ۇلى.