رەسەي پرەزيدەنتى ۆلاديمير ءپۋتيننىڭ باسپا ءسوز حاتشىسى دميتريي پەسكوۆ رەسەي دۋماسىنىڭ دەپۋتاتتارى ۆياچەسلاۆ نيكونوۆ، ەۆگەنيي فەدوروۆ، ۆلاديمير جيرينوۆسكييدىڭ قازاقستان مەملەكەتتىلىگى تۋرالى ايتقان داۋلى مالىمدەمەلەرىنە پىكىر ءبىلدىردى.
"رەسەي فەدەراسياسىنىڭ كونستيتۋسياسىنا سايكەس، ەلدىڭ سىرتقى ساياساتىن پرەزيدەنت ايقىندايدى" دەلىنگەن پەسكوۆتىڭ كازتاگ اگەنتتىگىنە بەرگەن جاۋابىندا.
بۇعان دەيىن رەسەي مەملەكەتتىك دۋماسىنىڭ دەپۋتاتى ۆياچەسلاۆ نيكونوۆ "قازاقستان اۋماعى رەسەي تاراپىنان جاسالعان ۇلكەن سىي" دەپ مالىمدەگەن. دەپۋتات ءسوزى قازاقستاندا قىزۋ تالقىلانىپ، قازاقستان سىرتقى ىستەر مينيسترلىگى دەپۋتاتقا نارازىلىق نوتا جولداعان. ۇزاماي تاعى ءبىر رەسەي دەپۋتاتى ەۆگەنيي فەدوروۆ "قازاقستان رەسەيگە ءوز اۋماعىن قايتارۋعا ءتيىس" دەپ، قازاقستان تەرريتوريا رەسەي تاراپىنان جاسالعان سىيلىق ەكەنىنە مەڭزەپ، ونى سىيعا بەرىلگەن كولىكتىڭ مىسالىندا تۇسىندىرۋگە تىرىسقان. ارتىنشا الماتىدا تۋعان رەسەي دەپۋتاتى ۆلاديمير جيرينوۆسكيي نيكونوۆ ءسوزىن قولدايتىنىن جەتكىزىپ، "تۇتاس قازاقستان رەسەيدىكى" دەپ مالىمدەدى.
رەسەي دۋپۋتاتتارىنىڭ مۇنداي مالىمدەمەلەرى قازاقستاندا قارسىلىق تولقىنىن تۋدىردى. الەۋمەتتىك جەلىدە ازاماتتار دەپۋتاتتارعا نارازىلىقتارىن ءبىلدىرىپ جاتتى.
سىرتقى ىستەر مينيسترلىگىنەن بولەك، دەپۋتاتتار دا ماسەلە بويىنشا ۇستانىمدارىن ءبىلدىردى.
ءماجىلىس دەپۋتاتى باقىتبەك سماعۇل ۆياچەسلاۆ نيكونوۆتى "ارانداتۋشى" دەپ اتاسا، سەناتور مۇحتار قۇل-مۇحاممەد نيكونوۆ مالىمدەمەسىنە "بۇل – ساياسي جاۋاپسىزدىق قانا ەمەس، بەرىك دوستىق قارىم-قاتىناس ورناتا بىلگەن ميلليونداعان قازاق پەن ورىستىڭ تاريحي تانىمىن قورلاۋ" دەپ باعا بەرگەن.
ال ساياساتتانۋشى، بۇرىنعى ديپلومات قازبەك بەيسەبايەۆ دۋما دەپۋتاتتارىنىڭ مۇنداي مالىمدەمە جاساۋى "وتە تۇسىنىكسىز"، ماسەلەگە پرەزيدەنت توقايەۆ ارالاسپاسا بولمايدى" دەپ ايتقان.
ساياساتتانۋشى دوسىم ساتپايەۆ "ەگەر قازاقستان ءوزىن قۇرمەتتەمەسە، وزگەلەر دە قۇرمەتتەۋدى قويادى" دەپ، قازاقستان بيلىگىن باتىل قادامدارعا بارۋعا شاقىرعان.
پىكىر قالدىرۋ