قىتايداعى وڭتۇستىك جۇڭگو تەڭىزىن زوندتاۋ باستاماسى (SCSPI) ساراپتامالىق ۇيىمى دجو بايدەننىڭ اقش پرەزيدەنتى لاۋازىمىنا كىرىسۋىنە دەيىن وڭتۇستىك جۇڭگو تەڭىزىندەگى شيەلەنىس جان-جاقتى سوعىسقا ۇلاسۋى مۇمكىن دەپ ەسكەرتتى. داۋلى ايماق توڭىرەگىندەگى قاۋىپسىزدىك ماسەلەلەرىنە نازار اۋداراتىن قىتايلىق ساراپتاما ورتالىعى Newsweek-كە ىقتيمال قاقتىعىس ءقاۋپى بار ەكەنىن ايتتى.
SCSPI دەپ اتالاتىن ساراپتامالىق ۇيىم شيەلەنىستىڭ كۇشەيۋى كەزىندە ەكى قۋاتتى مەملەكەت اراسىنداعى "كۇتپەگەن" قاقتىعىس ىقتيمالدىعىن جاريالادى.
ۇيىم "ءبىز ءالى كۇنگە دەيىن قاقتىعىس ءقاۋپى ارتىپ كەلەدى دەپ سانايمىز. سوڭعى كەزدەرى بۇقارالىق اقپارات قۇرالدارىندا از ايتىلعانىمەن، ءار كۇن سايىن ەكى جاقتا بىرنەشە مارتە بىر-بىرىنە بەتپە-بەت كەلدى. ەگەر اقش پەن جۇڭگو داعدارىسقا قارسى ءىس-قيمىلدىڭ ماڭىزدى شارالارىن تابا الماسا، اپات نەمەسە كۇتپەگەن جانجالدىڭ پايدا بولۋ ءقاۋپى ءالى دە جوعارى بولادى" دەپ مالىمدەدى..
تەڭىز ستراتەگياسىن زەرتتەۋ ورتالىعىنىڭ ديرەكتورى حۋ بو بۇعان دەيىن ۆاشينگتون مەن بەيجىڭ اراسىنداعى ىقتيمال قاقتىعىسقا قاتىستى الاڭداۋشىلىق بىلدىرگەن.
ول "اقش قىتايدان باسقا سالالاردا بولىنۋگە تىرىسقانىمەن، ولار ءالى دە تىعىز بايلانىستى. كەڭ اۋقىمدى قاقتىعىس مۇمكىندىگى از بولعانىمەن، ورتاشا نەمەسە كىشىگىرىم قاقتىعىس بولۋى مۇمكىن، مىسالى، ەكى اسكەري كەمە بىر-بىرىنە سوعىلۋى نەمەسە ەكى ەلدىڭ اسكەري كەمەلەرى مەن اۋە كەمەلەرى اندا-ساندا ايقاسۋى مۇمكىن" دەدى.
پىكىر قالدىرۋ