رەسەيدىڭ مەملەكەتتىك دۋما دەپۋتاتى ەۆگەنيي فەدوروۆ "بەلرۋسينفو" ارناسىنا بەرگەن سۇحباتىندا "ورىنبور دا، قىزىلوردا، الماتى دا، قازاقستان دا رەسەيدىڭ ءبىر سۋبەكتىسى بولدى" دەگەن مالىمدەمە جاسادى. جۋرناليست دەپۋتاتقا "رەسەي قازاقستانعا "جالعا بەرگەن" جەر تۋرالى ايتقانىڭىزعا قازاقستان ازاماتتارى نارازىلىق ءبىلدىرىپ، ءبىراز داۋ بولدى. وسىعان پىكىرىڭىزدى ءبىلدىرىڭىزشى. جەر تۋرالى ايتقاندا نەنى مەڭزەدىڭىز؟" دەگەن سۇراق قويادى.

–  ولار وزدەرىنىڭ زاڭدى دالەلدەرى جوق ەكەنىن جاقسى بىلەدى. سول ءۇشىن بوس ايقايعا سالىپ جاتىر. ال مەن قازاقستاننىڭ رەسەي فەدەراسياسىنان جەر الىپ جاتقانى تۋرالى قولحات ۇسىندىم. ول جەردى قازاقستان كەڭەس وداعىنىڭ قۇرامىندا بولعان ۋاقىتقا دەيىن يەمدەنە الادى، – دەدى فەدوروۆ .

ونىڭ ايتۋىنشا، كەڭەس وداعى كەزىندە بەرىلگەن جەردىڭ ءۇش ساناتى بولعان. ءبىرىنشىسى، وداققا كىرگەن ەلدەردىڭ وزىندە بولعان ايماقتارى. ەكىنشىسى، رەسپۋبليكالارعا وداقتىڭ بەرگەن جەرى. ەگەر سول ەلدەر وداقتان شىعاتىن بولسا، جەردى قايتارىپ بەرۋگە مىندەتتى. ءۇشىنشىسى، وداققا كىرگەن رەسپۋبليكالاردىڭ وزگە وداقتاس رەسپۋبليكالاردان جالعا العان جەرلەرى. بۇل پۋنكت، دەپۋتتاتتىڭ ايتۋىنشا، ەڭ قاتاڭ ءتۇرى ەكەن.

– قازاقستان جەر ساناتى بويىنشا اتالعان ۇشىنشىسىنە كىرەدى. بۇل ەل – كەڭەس وداعىنداعى وزگە ەلدەردەن جەردى شارتتى تۇردە جالعا العان مەملەكەت. ەگەر وداق ىدىراسا، ول جەرلەردىڭ قايتارىمى بولۋى كەرەك. كەڭەس وداعىنداعى كەلىسىم-شارتتا وسىلاي جازىلعان، – دەدى ول.

فەدوروۆ "قازاقستان اۋماعى – رەسەي تاراپىنان جاسالعان سىي" دەگەن پىكىرگە سەناتور مۇحتار قۇل-مۇحاممەدتىڭ بەرگەن جاۋابىن "ورىنسىز كەلەكەتۋ" دەپ باعالادى.

– ءبىز ەموسياعا بەرىلىپ جاتقان جوقپىز. قازاقستانداعى شەنەۋنىكتەر مەنىمەن سويلەسپەيدى. سەبەبى مەن ولار سياقتى ەمەس، ناقتى دالەل كەلتىرەمىن. 

جالپى قازاقستان زاڭسىز جانە ۋاقىتشا مويىندالعان دەۋگە بولاتىن شىعار. سەبەبى، كسرو تارادى دەگەن ناقتى بىردە-بىر قۇجات جوق.  ەگەر زاڭعا سۇيەنسەك، 1922 جىلى قازاقستان دەگەن بولعان جوق، ونىڭ 1 مم جەرى دە بولماعان. ورىنبور دا، قىزىلوردا، الماتى دا، قازاقستاننىڭ باسقا قالالارى رەسەيدىڭ ءبىر سۋبەكتىسى بولدى، – دەدى دۋما دەپۋتاتى قازاقستاندىقتاردى رەسەي ازاماتى بولۋعا شاقىرىپ.