«Nur Otan»-نىڭ رەسپۋبليكالىق سايلاۋالدى شتابى قىزىلوردا وبلىسىنا كەلدى. ولار ءبىلىم جانە دەنساۋلىق ساقتاۋ سالاسىنىڭ قىزمەتكەرلەرىمەن، اۋىل شارۋاشىلىق كاسىپورىندارىنىڭ ۇجىمىمەن، جاستارمەن جانە باسقا دا ازاماتتارمەن جۇزدەسىپ، ۇزىن سانى 15-كە جۋىق كەزدەسۋ وتكىزدى.

سونىمەن، وڭىردەگى كاسىپكەر ايەلدەرمەن كەزدەسۋ بارىسىندا بيلەۋشى پارتيانىڭ تاياۋداعى 5 جىلعا ارنالعان سايلاۋالدى باستامالارى اڭگىمە ارقاۋىنا اينالدى.

«ەلباسى، پارتيا ليدەرى نۇرسۇلتان نازاربايەۆتىڭ تاپسىرماسى بويىنشا اتقارۋشى، وكىلدى، سوت ورگاندارى مەن كۆازيمەملەكەتتىك سەكتوردا باسشىلىقتاعى ايەلدەردىڭ ۇلەسىن 30%-كە دەيىن ۇلعايتۋدى نيەت ەتىپ وتىرمىز. سونىمەن قاتار ايەلدەر كاسىپكەرلىگىن دامىتۋ ورتالىعىن قۇرۋ، ايەلدەردى جەڭىلدەتىلگەن نەسيەمەن جانە گرانتتارمەن قامتاماسىز ەتۋ سەكىلدى ىستەر دە جوسپارلانىپ جاتىر»، - دەپ اتاپ ءوتتى رەسپۋبليكالىق سايلاۋالدى شتاب جەتەكشىسى باۋىرجان بايبەك.

ونىڭ ايتۋىنشا، ەلىمىزدىڭ وڭىرلەرى، قالالارى مەن اۋداندارى بويىنشا جۇمىسپەن قامتۋ، بازالىق الەۋمەتتىك قىزمەتتەر مەن ءارتۇرلى مەملەكەتتىك قولداۋ شارالارىنا قولجەتىمدىلىك ماسەلەلەرىن قامتيتىن گەندەرلىك قاجەتتىلىكتەر كارتاسى ازىرلەنەدى.

جالپى، جەكە بيزنەسىن اشۋ ءۇشىن 50 مىڭ ازاماتقا شاعىن نەسيە بەرىلەدى، ونىڭ ىشىندە جالپى سوماسى 250 ملرد. تەڭگە بولاتىن نەسيە 42 مىڭ اۋىلدىق ازاماتقا باعىتتالادى.

ۇكىمەتتىك ەمەس ۇيىمدار وكىلدەرىمەن كەزدەسۋدە ەلدەگى دەموكراتيانىڭ ورىستەۋىنە جول اشاتىن جاۋاپتى ازاماتتىق قوعامدى دامىتۋ ماسەلەلەرى كوتەرىلىپ، وسى باعىتتاعى ءبىرقاتار ويلار ورتاعا سالىندى.

پارتيا باسپا ءسوز قىزمەتىنىڭ حابارلاۋىنشا، «Nur Otan» «جاۋاپتى ازامات – جاۋاپتى قوعام – جاۋاپتى مەملەكەت» فورمۋلاسى بويىنشا جالپىعا ورتاق جاۋاپكەرشىلىك تۇجىرىمداماسىن ۇسىنىپ وتىر.

وسىعان بايلانىستى نۇروتاندىقتار ەلدەگى وزەكتى ماسەلەلەردى بىرلەسە شەشۋ مەن مەملەكەتتى دامىتۋ ىسىنە ازاماتتىق بەلسەندىلەردى قارقىندى تۇردە ارالاستىرۋدى جوسپارلاۋدا.

بۇل جۇمىستار جۇيەلى ءجۇرۋى ءۇشىن جەرگىلىكتى ءوزىن-وزى باسقارۋ تۇجىرىمداماسى ازىرلەنەتىن بولادى. اتالعان قۇجاتتا اۋىل اكىمدەرىن تىكەلەي سايلاۋ، ولاردىڭ سايلاۋشىلار الدىنداعى ەسەپتىلىگى، «حالىق قاتىساتىن» بيۋدجەتتى ەندىرۋ، جەرگىلىكتى سالىق پەن تولەمدەر ستاۆكالارىن وزگەرتۋ قۇقىعى، جەرگىلىكتى ءوزىن-وزى باسقارۋدى ازاماتتىق قاداعالاۋ جانە تاعى دا باسقا ماسەلەلەر قامتىلادى.

«ءبىز ەلىمىزدە ساياسي ديالوگ جاساۋ مادەنيەتىن جۇيەلى تۇردە دامىتاتىن بولامىز. بۇل ءۇشىن «قوعامدىق باقىلاۋ تۋرالى» زاڭ قابىلداۋ جوسپارلانۋدا. بۇل زاڭدا قوعامدىق ساراپتاما جۇرگىزۋ مەن باقىلاۋ ءتارتىبى، ازاماتتىق باستامالار مەن ونلاين-پەتيسيالارعا جول اشۋ سەكىلدى تەتىكتەر كوزدەلەدى»، - دەدى پارتيا ءتوراعاسىنىڭ ءبىرىنشى ورىنباسارى.

پارتيا ازاماتتىق قوعاممەن بىرلەسە وتىرىپ، ەكولوگيالىق ماسەلەلەردى شەشۋ، تابيعاتقا ايالاي قاراۋ مادەنيەتىن كۇشەيتۋ جايىنا ءجىتى ءمان بەرىپ، وعان ماڭىزدى مىندەتتەرىنىڭ ءبىرى رەتىندە باسىمدىق بەرىپ وتىر.

جالپى، ءوڭىر حالقىمەن كەزدەسۋدە اۋىز سۋمەن قامتاماسىز ەتۋ، تۇرمىسى تومەن وتباسىلارعا قولداۋ كورسەتۋ، اگرارلىق سالانى دامىتۋ جايى دا كوتەرىلىپ، جان-جاقتى تالقىلاندى.

وسى جايتتار ەسكەرىلە وتىرىپ، «Nur Otan»-نىڭ وڭىرلىك سايلاۋالدى باعدارلاماسى اياسىندا 20-دان استام ەلدى مەكەننىڭ 7 مىڭداي تۇرعىنىن ساپالى اۋىز سۋمەن قامتاماسىز ەتۋ، جاڭادان 27 دەنساۋلىق ساقتاۋ نىسانىن سالۋ، وبلىستا 67 مىڭنان استام جۇمىس ورنىن اشۋ جوسپارلانۋدا. ءوڭىردىڭ تۇرمىس-تىرشىلىگىندە ەرەكشە ماڭىزى بار سىرداريا وزەنىنىڭ ارناسىن رەتتەۋ جانە ارال تەڭىزىنىڭ سولتۇستىك بولىگىن ساقتاۋ جوباسىن ىسكە اسىرۋ دا ارى قاراي ءوز جالعاسىن تابادى.

«Nur Otan» پارتياسىنىڭ سايلاۋ قورى قاراجاتى ەسەبىنەن تولەندى.