الماتى وبلىسىنداعى قۇس فابريكالارىنىڭ بىرىندە وتتەگىنىڭ جەتىسپەۋشىلىگىنەن 41 مىڭ تاۋىق تۇنشىعىپ، قىرىلىپ قالدى، دەپ حابارلادى Tengrinews.kz.
وقيعا ۇيعىر اۋدانىندا ورنالاسقان Otan Green Food ج ش س قۇس فابريكاسىندا بولعان. اكىمدىكتەگىلەر قۇستىڭ قىرىلۋىن اۆتوماتيكانىڭ ىستەن شىعۋىمەن بايلانىستىرىپ وتىر.
"ەكىنشى برويلەر سەحىنىڭ ءۇشىنشى كورپۋسىندا ميكروكليماتتى باقىلايتىن كومپيۋتەر ىستەن شىقتى. بۇل اۋا بەرۋ كلاپاندارىنىڭ جابىلۋىنا جانە بولمە تەمپەراتۋراسىنىڭ كوتەرىلۋى مەن وتتەگىنىڭ ازايۋىنا اكەلىپ سوقتى. اتالعان فاكتىنى كاسىپورىننىڭ ۆەتەرينارلىق قىزمەتى راستادى" دەلىنگەن ۇيعىر اۋدانى اكىمدىگىنىڭ حابارلاماسىندا.
اكىمدىكتە قۇس تۇماۋىن انىقتاۋ بويىنشا جۇمىستار جۇرگىزىلگەنىن، سىناقتىڭ تەرىس ناتيجە كورسەتكەنىن اتاپ ءوتتى.
نازار اۋدارىڭىز! بەينە 18 جاسقا تولماعان ادامدارعا، جۇكتى جانە كوڭىلشەك ادامدارعا ۇسىنىلمايدى.
