"نامىس" جاستار قوزعالىسىنىڭ مۇشەلەرى سولتۇستىك قازاقستان وبلىسىنىڭ اكىمى قۇمار اقساقالوۆقا پەتيسيا تاپسىردى. پەتروپاۆلعا بارعان بەلسەندىلەر سقو ورتالىعىنا بايىرعى قىزىلجار اتاۋىن قايتارۋدى تالاپ ەتكەن. سونىمەن قاتار جاستار ورىس ساياساتكەرلەرىن ورنىنا قويۋ  "بيلىك تىزگىنىندەگى" ازاماتتاردىڭ مىندەتى ەكەنىن ايتقان. 

جاقىندا رەسەي دۋماسىنىڭ دەپۋتاتى جانە "بولشايا يگرا" باعدارلاماسىنىڭ جۇرگىزۋشىسى ۆياچەسلاۆ نيكونوۆ "پەرۆىي كانال" مەملەكەتتىك تەلەارناسىنىڭ ەفيرىندە "قازاقستان اۋماعى – رەسەي تاراپىنان جاسالعان سىي" دەپ مالىمدەمە جاساعان. قازاقستان سىرتقى ىستەر مينيسترلىگى دەپۋتاتقا جاۋاپ بەرسە دە، مۇنداي سارىنداعى مالىمدەمەلەردىڭ ايتىلۋى توقتامادى. سوعان بايلانىستى "نامىس" جاستار قوزعالىسىنداعى بەلسەندى توپ وزدەرىنىڭ پاراقشاسىنا جاريالاعان ۆيدەودا اتالمىش ماسەلەنى دە كوتەردى.

–  وزدەرىڭىزگە ءمالىم، كورشىلەس رەسەيدىڭ كەيبىر سايقىمازاق ساياساتكەرلەرى قازاقتىڭ قانمەن كەلگەن جەرىن سىيلىق دەپ وزدەرىن «جومارت» قىلىپ كورسەتىپ ءجۇر. و زامان دا بۇ زامان، توپىراققا تالاسىپ شىر-پىر بولعان ادامزات بالاسى ءبىر قارىس جەر ءۇشىن قانداس قانىن توككەنى تاريحتان بەلگىلى. ەگەر، رەسەي شىنىمەن دە جومارت بولسا، دالەلدەسىن. قاراماعىنداعى تالاي ۇلتتى قىرىمدى ۋكرايناعا، ورىنبوردى قازاققا قايتارسىن!

ال، پەتروپاۆل، پاۆلودارعا كەلسەك، شاكەن ايمانوۆ، قانىش ساتپايەۆ، سۇلتانماحمۇت تورايعىروۆ، جۇسىپبەك ايماۋىتوۆ، الكەي مارعۇلان، ءسابيت مۇقانوۆ، ماعجان جۇمابايەۆ سىندى نەشە ءتۇرلى الىپتاردى ومىرگە اكەلىپ، قانات بىتىرگەن ولكەنى قازاققا قۇداي سىيعا تارتقان. تاۋەلسىزدىك العان 30 جىل ىشىندە مەملەكەتتىك ماڭىزى بار قالا اتاۋىن قازاقشالاي الماۋ قازاقتىعىمىزعا سىن. بۇل جەر قاشاننان ءبىزدىڭ جەر!

ەل باسىندا، بيلىك تىزگىنىندە وتىرعان اعالار كەلەسى ءجۇرىس سىزدەردە. سالا قۇلاش ءتىلى بار، سوزدەن قايتپاس ءتۇرى بار ورىس ساياساتكەرلەرىن ورنىنا قويۋ سىزدەردىڭ اتا-بابالار الدىنداعى مىندەتىڭىز، بولاشاق بۋىن الدىنداعى بورىشىڭىز.

بۇگىن ماسەلەنى شەشە الماساق، بولاشاق الدىندا ۇياتتىمىز. كەلەر ۇرپاق جارتى عاسىر وسىنى ايتپاي، وزگەرتپەي نە ىستەدىڭىزدەر دەسە، نە بەتىمىزدى ايتامىز؟! وسىنى ەلگە ەستىرتۋ ءۇشىن بۇگىن الماتىدان ماعجان اتامىز تۋعان ولكەگە ارنايى كەلدىك. وتىز ەلدىڭ قاتارىنا كىرۋ الدىندا تۇرعان تاۋەلسىز ەلگە قالا اتاۋىن اۋىستىرۋ ءۇشىن 30 جىل قاجەت ەمەس. تاعى قانشا جىل كۇتۋگە بولادى؟!، – دەللىنگەن جاستاردىڭ ۇندەۋىندە.