BBC جۇڭگو اقش-تى باسىپ وزىپ، 2028 جىلعا قاراي الەمدەگى ەڭ ءىرى ەكونوميكاعا اينالاتىنىن حابارلادى. بۇل بۇرىنعى بولجامدى ۋاقىتتان بەس جىل ەرتە.

ۇلىبريتانيادا ورنالاسقان ەكونوميكا جانە بيزنەستى زەرتتەۋ ورتالىعى (CEBR) جۇڭگو Covid-19-دى "شەبەر" جونگە سالۋ ارقىلى الداعى جىلدارى سالىستىرمالى ءوسىمىن ارتتىرادى دەيدى.

سونىمەن قاتار ءۇندىستان 2030 جىلعا قاراي ءۇشىنشى ءىرى ەكونوميكاعا اينالادى.

CEBR ءوزىنىڭ ەكونوميكالىق ليگاسىنىڭ كەستەسىن جىل سايىن 26 جەلتوقساندا شىعارادى.

جۇڭگو Covid-19 سوققىسىنىڭ العاشقى ەلى بولعانىمەن، ول اۋرۋدى جەدەل جانە وتە قاتاڭ شارالار ارقىلى باقىلاپ وتىردى جانە بەيجىڭ ەۋروپالىق ەلدەر سياقتى ەكونوميكالىق تۇرعىدان دارمەنسىز ەتەتىن شارالاردى قاجەت ەتپەدى.

ناتيجەسىندە، باسقا ءىرى ەكونوميكالاردان ايىرماشىلىعى، جۇڭگو 2020 جىلى ەكونوميكالىق رەسەسسيانى بولدىرمادى جانە ءىس جۇزىندە بيىل 2% وسەدى دەپ بولجانۋدا.

اقش ەكونوميكاسى، كەرىسىنشە، پاندەميادان ەڭ اۋىر زارداپ شەككەن ەل قاتارىنا كىردى. اقش-تا 330 مىڭنان استام ادام قايتىس بولدى جانە 18،5 ميلليونعا جۋىق اۋرۋ جاعدايى راستالدى.

اقشا-نەسيە ساياساتى مەن زور كولەمدى بيۋدجەتتىك ىنتالاندىرۋ ەلدىڭ ەكونوميكالىق زاردابىن جەڭىلدەتەدى، ءبىراق جاڭا ىنتالاندىرۋ پاكەتى تۋرالى ساياسي كەلىسپەۋشىلىكتەر جاڭا جىلدا شامامەن 14 ميلليون جۇمىسسىز امەريكالىقتى تولەمدەرسىز قالدىرۋى مۇمكىن.

"ءبىراز ۋاقىتتان بەرى جاھاندىق ەكونوميكانىڭ نەگىزگى تاقىرىبى اقش پەن جۇڭگو اراسىنداعى ەكونوميكالىق جانە جۇمساق كۇشتەر كۇرەسى بولدى. Covid-19 پاندەمياسى جانە سوعان سايكەس ەكونوميكالىق قۇلدىراۋى باسەكەلەستىكتى قىتايدىڭ پايداسىنا شەشتى" دەلىنگەن CEBR بايانداماسىندا. 

باياندامادا "2021 جىلى پاندەميادان كەيىنگى كۇشتى ورلەۋ" اياقتالعاننان سوڭ اقش ەكونوميكاسى 2022-24 جىلدار ارالىعىندا جىل سايىن شامامەن 1،9% وسەتىنى، سودان كەيىنگى جىلدارى 1،6%-عا دەيىن باياۋلايتىنى ايتىلعان.

كەرىسىنشە، جۇڭگو ەكونوميكاسى 2025 جىلعا دەيىن جىل سايىن 5،7%، ال 2026-2030 جىلدار ارالىعىندا 4،5% وسەدى.

"قىتايدىڭ الەمدىك ەكونوميكاداعى ۇلەسى 2000 جىلى نەبارى 3،6%-دان ءقازىر 17،8%-عا دەيىن ءوستى جانە 2023 جىلعا قاراي ەل "جوعارى كىرىستى ەكونوميكاعا" اينالادى" دەلىنگەن حابارلامادا.

"جۇڭگو ەكونوميكاسى Covid-19-دى باقىلاۋدىڭ پايداسىن كورىپ قانا قويماي، سونىمەن قاتار دامىعان ءوندىرىس سياقتى سالالارعا باعىتتالعان اگرەسسيۆتى ساياساتتى قۇرا الادى" دەپ مالىمدەدى CEBR ءتوراعاسىنىڭ ورىنباسارى دۋگلاس ماكۆيليامس.

– ولار ءبىر دەڭگەيدە ورتالىقتاندىرىلعان باقىلاۋعا يە بولۋعا تىرىساتىن سياقتى، ءبىراق باسقا سالالاردا مۇلدەم ەركىن نارىقتىق ەكونوميكا. ەركىن نارىقتىڭ بولشەگى ولارعا تەحنولوگيا سياقتى سالالاردا العا جىلجۋعا كومەكتەسەدى، – دەدى ول BBC-گە.