ءبىلىم جانە عىلىم ءمينيسترى اسحات ايماعامبەتوۆ الداعى ۋاقىتتا جاستارمەن ەڭ وزەكتى ماسەلەلەردى تالقىلاپ، ولاردى شەشۋدىڭ ناقتى ستراتەگياسىن جاسايتىنىن ايتتى. بۇل تۋرالى ول ءوزىنىڭ الەۋمەتتىك جەلىدەگى پاراقشاسىندا جازدى.
– ءبىر اي بۇرىن ستۋدەنتتەرمەن كەزدەسۋ كەزىندە مينيسترلىك جانىنان ستۋدەنتتىك كەڭەس قۇرىلاتىنىن ايتقان بولاتىنمىن. ونىڭ قۇرامىدا ءاربىر ءىرى جوو-نىڭ ستۋدەنتتەرى اراسىنان ءبىر كوشباسشى جانە رەسپۋبليكالىق جاستار ۇيىمىنان ءبىر كوشباسشى بولادى. جوو اتىنان قابىلدانعان كوشباسشىلار ستۋدەنتتىك ءوزىن-وزى باسقارۋ ورگاندارىنىڭ ءتوراعالارى بولۋى كەرەك.
ستۋدەنتتەر ماسەلەلەرى جونىندەگى كەڭەستىڭ وتىرىستارىندا ءبىز جاستاردىڭ باستامالارىن دامىتۋعا جانە ستۋدەنتتەردى قولداۋعا قاتىستى سۇراقتاردى، بعم قۇزىرەتىنە كىرەتىن بارلىق ماسەلەلەردى بىرگە تالقىلايتىن بولامىز، – دەيدى مينيستر.
ونىڭ ايتۋىنشا، كوشباسشىلار ماڭىزدى ماسەلەلەردى كوتەرىپ، بىزگە ءوز يدەيالارىن تىكەلەي باعىتتاۋعا مۇمكىندىك الادى.
– رەسپۋبليكالىق كەڭەستىڭ ءار جينالىسىنا ءوزىم قاتىسامىن جانە ءبىز سۇراقتاردى تالقىلاپ، بىرگە شەشىم قابىلدايتىن بولامىز. بەلگىلەنگەن العاشقى وتىرىستا ءبىز جاستارمەن تانىسىپ، بولاشاققا جوسپارلاردى تالقىلاپ، جۇيەلى تۇردە ءوزارا جۇمىس جۇرگىزۋگە كەلىستىك. ستۋدەنتتەر ماسەلەلەرى جونىندەگى كەڭەستىڭ كەلەسى وتىرىسىن جاڭا جىلدىڭ قاڭتار ايىندا وتكىزۋدى جوسپارلاپ وتىرمىز. ءبىز جاستارمەن ەڭ وزەكتى ماسەلەلەردى تالقىلاپ، ولاردى شەشۋدىڭ ناقتى ستراتەگياسىن جاسايمىز. مۇنداي كەزدەسۋلەر ءار توقسان سايىن وتكىزىلەتىن بولادى، – دەپ اتاپ ءوتتى ايماعامبەتوۆ.
پىكىر قالدىرۋ