ءبىرىڭعاي جيناقتاۋشى زەينەتاقى قورى جيناقتىڭ ءبىر بولىگىن قالاي پايدالانۋعا بولاتىنىن ءتۇسىندىردى.

قور مالىمەتىنە سايكەس، 2020 جىلدىڭ 1 جەلتوقسانداعى جاعداي بويىنشا 761 مىڭنان استام جۇمىس ىستەيتىن سالىمشى جالپى كولەمى 2،4 ترلن تەڭگەدەن استام قاراجاتتى مەرزىمىنەن بۇرىن پايدالانۋ قۇقىعىن قولدانا الادى. جيناقتاردىڭ جەتكىلىكتىلىك سوماسىنان اساتىن ورتاشا سوماسى شامامەن 3،2 ملن. تەڭگەنى قۇرايدى.

زەينەتاقى جيناقتارىنىڭ ءبىر بولىگىن پايدالانۋ قۇقىعىن ىسكە اسىرۋ ءۇشىن ازاماتتار، ەڭ الدىمەن، ءوز جيناقتارىن تەكسەرىپ، جەتكىلىكتىلىك شەگىنەن اساتىن قاجەتتى سومانىڭ بار ەكەنىنە كوز جەتكىزۋگە ءتيىس.

زەينەتاقى جيناقتارىن الۋ تۋرالى شەشىم قابىلداعان ادامدار تۇرعىن ءۇي ساتىپ الۋ جانە ەمدەلۋ ماسەلەلەرى بويىنشا ۋاكىلەتتى وپەراتورعا جۇگىنە الادى، ونى ۇكىمەت ايقىندايدى.

سالىمشى زەينەتاقى جيناقتارىن ماقساتتى قاجەتتىلىكتەرگە العان كەزدە جەكە تابىس سالىعىن تولەۋ ءتاسىلىن تاڭداۋ قۇقىعىنا يە بولادى (جارنالار اۋدارىلعان كەزدە جتس الىنباعانىن ەسكەرتەمىز). ياعني ازاماتتار جتس تولەۋدى كەيىنگە قالدىرۋدى تاڭداسا بولادى نە تۇرعىن ءۇي جاعدايلارىن جاقسارتۋ جانە ەمدەلۋگە اقى تولەۋگە ارنالعان جيناقتارىن العان كەزىندە جتس-تى تولىق كولەمدە وتەي الادى.

"زەينەتاقى جيناعى ارنايى شوتتا 45 جۇمىس كۇنىنەن اسپايتىن ۋاقىت ىشىندە جاتادى. وسى مەرزىم ىشىندە جيناق نىسانالى ماقساتى بويىنشا پايدالانىلۋعا نەمەسە سالىمشىنىڭ بجزق-داعى زەينەتاقى شوتىنا قايتارىلۋعا ءتيىس" دەلىنگەن رەسمي حابارلامادا.

ال زەينەتاقى جيناعىنىڭ ءبىر بولىگىن سەنىمگەرلىك كومپانيانىڭ باسقارۋىنا بەرۋ ءۇشىن سالىمشى بجزق-عا قاجەتتى قۇجاتتارمەن بىرگە ءوتىنىش جازادى. ونى جەكە ءوزى اپارىپ بەرەدى، يا بولماسا، enpf.kz ينتەرنەت-رەسۋرس ارقىلى ەلەكتروندى سيفرلىق قولتاڭبامەن جىبەرە الادى. بۇدان بولەك، زەينەتاقى جيناعىن تەگىن مەديسينالىق كومەكتىڭ كەپىلدىك بەرىلگەن كولەمىنە كىرمەيتىن ەمدەۋ شارالارىنا جۇمساۋعا بولادى.