يندونەزياداعى ەڭ ۇلكەن كىتاپحانادا قازاق ادەبيەتىنىڭ جيناعى پايدا بولدى، دەپ حابارلادى 24.kz سايتى.

ونىڭ تۇساۋكەسەرىن ەلىمىزدىڭ دجاكارتاداعى ەلشىسى دانيار سارەكەنوۆ جاسادى. سالتاناتتى اشىلۋى ابايدىڭ 175 جىلدىعىنا ورايلاستىرىلدى. جيناقتاعى ەڭ ماڭىزدى كىتاپ – يندونەزيا تىلىنە اۋدارىلعان قازاق ويشىلدىڭ قارا سوزدەرى. بۇل باسىلىمدى اديتيا ادري سالەح اب راحيم باستاعان ءبىر توپ عالىمدار دايىندادى. قازاقستان ەلشىلىگىنىڭ تاپسىرماسىمەن ايگىلى بالي اعاش شەبەرى ۆايان مۋدانا اباي ءمۇسىنىن جاساعان. 24 قاباتتى يندونەزيا ۇلتتىق كىتاپحانا عيماراتى الەمدەگى ەڭ بيىك عيماراتتىڭ ءبىرى بولىپ سانالادى. جاڭا تەحنولوگيالارمەن جابدىقتالعان جوندەۋدەن وتكەن كىتاپ قورى 3 جىل بۇرىن اشىلعان. كىتاپحانا ديرەكتورىنىڭ ورىنباسارى ۆورو حاريانتي ايتقانداي، قازاق كىتاپتارىنىڭ قورى تولىقتىرىلادى. اتاپ ايتقاندا، قازاقستاننىڭ ۇلتتىق كىتاپحاناسىمەن ىنتىماقتاستىق جالعاسادى.

ۆورو حاريانتي، يندونەزيا ۇلتتىق كىتاپحاناسى ديرەكتورىنىڭ ورىنباسارى:

– ابايدىڭ قارا سوزدەرى – اقىننىڭ حالىق تاربيەسى مەن دۇنيەتانىمىن، ادامگەرشىلىك پەن قۇقىق، قازاق تاريحى ماسەلەلەرىن كوتەرگەن ەڭ ۇلى شىعارمالارىنىڭ ءبىرى. ول ومىردەگى ماڭىزدى سۇراقتارعا، شىندىق تۋرالى بىلىمگە جاۋاپ بەرەدى جانە ءومىردىڭ ءوزىن جاقسى تۇسىنۋگە كومەكتەسەدى. ابايدىڭ نازار اۋدارارلىق ومىرلىك ساباقتارى كوپتەگەن وقىرمانداردى شابىتتاندىراتىنىنا سەنىمدىمىن، ويتكەنى ونىڭ فيلوسوفيالىق پايىمداۋى تەك قازاقستانعا عانا ەمەس، بارلىق ەلدەرگە دە قاتىستى.