"قازگيدرومەت" 2020 جىلعى 31 جەلتوقسان مەن 2021 جىلعى 2 قاڭتار ارالىعىندا قازاقستان اۋماعى سۋىق سيكلون ىقپالىندا بولاتىنىن حابارلادى.

"قار مەن اۋا تەمپەراتۋراسىنىڭ كوتەرىلۋىنە اكەلگەن اتلانتيكالىق سيكلون تەك شىعىس ايماقتارعا اسەرىن ساقتايدى. قازاقستاننىڭ قالعان اۋماعىنداعى اۋا رايىن تايمىر اۋداندارىنان كەلەتىن سۋىق انتيسيكلون انىقتايدى. ول شىعىسقا قاراي جىلجىپ، سولتۇستىك جانە شىعىس وبلىستاردا اۋا تەمپەراتۋراسىنىڭ تۇندە 30-35-كە دەيىن، جەكەلەگەن اۋدانداردا 40 گرادۋسقا دەيىن تومەندەۋىنە اكەلەدى" دەلىنگەن قازگيدرومەت بولجامىندا.

سونداي-اق 2 قاڭتار كۇنى الماتى وبلىسىندا اۋا تەمپەراتۋراسى -20-25، وبلىستىڭ سولتۇستىگىندە 30 گرادۋسقا دەيىن كۇرت تومەندەيدى.

جامبىل وبلىسىنىڭ سولتۇستىگىندە 25-30 گرادۋس اياز بولادى. 2-3 قاڭتار كۇندەرى سولتۇستىك قازاقستان، اقمولا، پاۆلودار، قاراعاندى وبلىستارىندا 32-37، كەي جەرلەردە 42 گرادۋس اياز بولادى. شىعىس قازاقستان وبلىسىندا 2-4 قاڭتار ارالىعىندا 32-37، كەي جەرلەردە - 43 گرادۋس قاتتى اياز كۇتىلەدى. اۋا رايى بولجامىنىڭ دالدىگى 95-100%.