دەنساۋلىق ساقتاۋ ۆيسە-مينيسترى - باس سانيتار دارىگەر ەرلان قياسوۆ ورتالىق سايلاۋ كوميسسياسىنىڭ وتىرىسىندا قازاقستان رەسپۋبليكاسى پارلامەنتى ءماجىلىسى مەن ءماسليحات دەپۋتاتتارىنا داۋىس بەرۋ كەزىندە كوروناۆيرۋس ينفەكسياسىنىڭ تارالۋىنىڭ الدىن الۋ جانە سانيتارلىق-ەپيدەميولوگيالىق قاۋىپسىزدىكتى قامتاماسىز ەتۋ جانە ازاماتتاردىڭ دەنساۋلىعىن قورعاۋ الگوريتمى جايلى ايتتى.
الگوريتمگە ساي تومەندەگىدەي تالاپتار قويىلادى:
- ءاربىر سايلاۋ ۋچاسكەسىندە كىرەبەرىستە مەديسينا قىزمەتكەرلەرى نەمەسە ۆولونتەر كەزەكشىلىكپەن تەرمومەتر ارقىلى كەلگەن ازاماتتاردىڭ تەمپەراتۋراسىن ولشەۋى كەرەك؛
- قولدى دەزينفەكسيالاۋعا ارنالعان سانيتايزەر بولۋى ءتيىس؛
- سايلاۋشىلاردىڭ قوزعالىس باعىتى بويىنشا اراقاشىقتىق بەلگىلەر مەن نۇسقاۋلىق بولۋعا ءتيىس؛
- پايدالانىلعان جەكە قورعانىس قۇرالدارىن تاستاۋعا ارنالعان كونتەينەرلەر، دەنە قىزۋى كوتەرىلگەن (37ºس-تان جوعارى) جاعدايدا ادامداردى وقشاۋلاۋعا ارنالعان جەكە ورىن بولۋى قاجەت.
سايلاۋ كوميسسيالارىنىڭ قىزمەتىن ۇيىمداستىرۋ كەزىندە كوميسسيا مۇشەلەرى ءاربىر 3 ساعات سايىن ماسكانى اۋىستىرۋعا ءتيىس، ىشكە كىرگەندە قولدى تازالاۋ، ال قول الىسۋعا جانە كەلۋشىلەرمەن جاقىن بايلانىسۋعا بولمايدى، سايلاۋ كوميسسياسى نىسانىن ىلعالدى تازالاپ، جيھاز بەن تەحنيكالىق جابدىقتى بىر-بىرىنەن كەمىندە 1،5-2 مەتر قاشىقتىقتا ورنالاستىرۋ قاجەت.
بۇدان باسقا، سايلاۋ بيۋللەتەندەرىن تاراتقاندا تىكەلەي بايلانىس ورناتۋعا بولمايدى.
سايلاۋشىلار جەكە باسىن كۋالاندىراتىن قۇجاتتى سايلاۋ كوميسسياسىنىڭ مۇشەسىنە كورسەتەدى، ءبىراق قولىنا بەرىلمەيدى.
– سايلاۋشىلار سايلاۋ ۋچاسكەسىنە بارعاندا مەديسينالىق ماسكا جانە انتيسەپتيكالىق سۇيىقتىق قولدانۋى كەرەك. بيۋللەتەندى العان كەزدە كوميسسيا مۇشەلەرىنىڭ قولىنا بەرمەيدى، جەكە باسىن كۋالاندىراتىن قۇجاتتى اشىپ كورسەتۋى كەرەك. داۋىس بەرۋگە ءوز قالامىڭىزدى الا كەلىڭىز، بولماعان جاعدايدا سايلاۋ كوميسسياسى بەرگەن قالامدى پايدالانىڭىز. بالا ەرتىپ كەلۋگە بولمايدى.
ۇيدە ەمدەلۋىنە بايلانىستى وقشاۋلاۋ رەجيمىندەگى نەمەسە كوروناۆيرۋس ينفەكسياسىنا بايلانىستى كارانتيندە وتىرعان داۋىس بەرۋگە قاتىسۋشىلار سايلاۋ ۋچاسكەسىنەن تىس جەردە داۋىس بەرۋ تۋرالى ءوتىنىش بىلدىرگەن جاعدايدا سايلاۋ كوميسسياسىنىڭ مۇشەسىنە حابارلاۋعا ءتيىس، – دەدى باس سانيتار دارىگەر.
پىكىر قالدىرۋ