تەسلانىڭ زىمىران جىلدامدىعىنداي قىمباتتاعان اكسيالارىنىڭ باعاسى 2020 جىلى "Teslanaires" دەپ اتالاتىن ميلليونەرلەر ارمياسىن قالىپتاستىردى.

يلون ماسكتىڭ ەلەكتروموبيلدەر شىعاراتىن فيرماسىنىڭ اكسيالارى 2020 جىلى 700%-عا ءوستى جانە الەمدەگى ەڭ قىمبات اۆتوموبيل كومپانياسىنا اينالدى.

2020 جىل اقش S&P 500 قۇرامىنا كىرگەن اۆتوموبيل كومپانياسى ءۇشىن ماڭىزدى كەزەڭ بولدى. S&P 500 – قۇراما شتاتتارداعى ەڭ ءىرى اكسيالار يندەكسى. وعان Apple، Microsoft جانە Facebook سياقتى كومپانيالار كىرەدى. تەسلا اكسيالارى جوعارى جىلدامدىقپەن ءوسىپ، يندەكس بويىنشا ەڭ قۇندى 10 كومپانيانىڭ قاتارىنا ەندى.

تەسلا اكسياسى قازىرگى ۋاقىتتا General Motors، Ford، Fiat Chrysler Automobiles جانە Toyota كومپانيالارىنىڭ جالپى قۇنىنان دا جوعارى. 

2010 جىلدىڭ ماۋسىمىندا تەسلانىڭ  ءار اكسياسى 17 دوللار باعامەن بيرجاعا شىققان. وسى اپتادا باعا 650 دوللاردان اسىپ ءتۇستى.

قازىرگى كەزدە تەسلاعا قاتتى سەنەتىن جانە يلون ماسك اۆتوموبيل فيرماسىنىڭ جارقىن بولاشاعىنا نەگىزدەلگەن اكسيالار باعاسىنىڭ ءوسۋىن بولجايتىن جانكۇيەرلەر ارمياسى بار.

لوس-اندجەلەستەگى ينجەنەر دجەيسون دەبولتتىڭ تەسلاعا سالعان العاشقى ينۆەستيسياسى 2500 اكسيا، ال، ونىڭ قۇنى 19000 دوللار بولعان.

"مەن العاش رەت تەسلاعا ينۆەستيسيا سالۋدى 2013 جىلى Model S كولىگىن ساتىپ العاننان كەيىن باستادىم" دەدى ول. سودان بەرى ول كوبىرەك اكسيالار ساتىپ العان، ال ءقازىر ونىڭ يەلىگىندە تۇرعان اكسيالاردىڭ قۇنى شامامەن 10 ملن دوللار.

نيۋ-يوركتەگى سكوتت تيسدەيل 2013 جىلى Model S-گە العاش كوزى تۇسكەندە تەسلاعا ينۆەستيسيا سالا باستادى جانە شامامەن 4000 اكسيانى يەمدەنىپ ۇلگەردى، ال، ولاردىڭ قۇنى قازىرگى ۋاقىتتا شامامەن 2.8 ملن دوللار.