كاراتەدەن قازاقستان ۇلتتىق قۇراماسىنىڭ باس باپكەرى جاستالاپ ساناۋوۆ قايتىس بولدى. بۇل تۋرالى پرەزيدەنت كەڭەسشىسى ەرلان قارين facebook پاراقشاسىندا حابارلادى.

– جاستالاپ ساناۋوۆ قازاقستاندىق كاراتە قوزعالىسىنىڭ نەگىزىن قالاۋشىلاردىڭ ءبىرى بولدى. ول كوپ جىلدار بويى قازاقستان كاراتە-دو فەدەراسياسىن باسقاردى. الەمگە ايگىلى "Jk Fan" كاراتە جۋرنالىنىڭ قازاقستاندىق نۇسقاسىن شىعاردى. ونىڭ ارقاسىندا قازاقستاندا بەدەلدى حالىقارالىق تۋرنيرلەر وتكىزىلدى. ول حالىقارالىق كاراتە قاۋىمداستىعىندا قۇرمەتكە يە بولدى. ول دۇنيەجۇزىلىك كاراتە-دو فەدەراسياسى اتقارۋ كوميتەتىنىڭ قۇرامىنا سايلانعان تمد ەلدەرىنىڭ ءبىرىنشى جانە جالعىز وكىلى بولدى، – دەپ جازدى ول.

ونىڭ ايتۋىنشا، مارقۇم ساناۋوۆ توكيوداعى وليمپيادا ويىندارىندا قازاقستاندىق كاراتەشى وليمپيادا التىنىن جەڭىپ الۋدى ارمانداعان.

جاستالاپ ساناۋوۆ 1966 جىلى 26 مامىردا الماتىدا دۇنيەگە كەلگەن. حالىقارالىق سپورت شەبەرى، قازاقستاننىڭ ەڭبەك سىڭىرگەن جاتتىقتىرۋشىسى.

1986 جىلى جاتتىقتىرۋشىلىقپەن اينالىستى، كوپتەگەن حالىقارالىق سپورت شەبەرلەرىن جانە الەم چەمپيوندارىن دايىندادى.