پرەزيدەنت قاسىم-جومارت توقايەۆ پرەمەر-مينيستر اسقار ءماميندى قابىلدادى. بۇل تۋرالى اقوردا سايتى حابارلادى.

سايت مالىمەتىنشە، مامين مەملەكەت باسشىسىنا 2020 جىلدىڭ قورىتىندىسى بويىنشا ەل دامۋىنىڭ ماكروەكونوميكالىق كورسەتكىشىنىڭ بولجامدى ەسەبى مەن رەسپۋبليكاداعى سانيتارلىق-ەپيدەميولوگيالىق احۋال جايىندا باياندادى.

پرەمەر-مينيستر پرەزيدەنتكە 2020 جىلى ناقتى سەكتورداعى ءوندىرىس كولەمى 2 پايىزعا ارتقانى جايىندا اقپارات بەردى.

"وڭدەۋ ونەركاسىبى 3،3 پايىزعا، ونىڭ ىشىندە ازىق-تۇلىك ءوندىرىسى 3،6 پايىزعا، فارماسيەۆتيكا 40 پايىزعا، دايىن مەتالل ونىمدەرىن ءوندىرۋ 20 پايىزعا، ماشينا جاساۋ 16 پايىزعا، اتاپ ايتقاندا اۆتوموبيل ءوندىرىسى 53 پايىزعا، جەڭىل ونەركاسىپ 16 پايىزعا وسكەن. سولايشا ناقتى سەكتور ۇلتتىق ەكونوميكانىڭ تۇراقتىلىعىن ساقتاۋدىڭ باستى فاكتورىنا اينالعان" دەلىنگەن رەسمي سايت حابارلاماسىندا.

اسقار مامين مەملەكەت باسشىسىنا ۇزاق مەرزىمدى ورتا كورسەتكىشتەر بويىنشا قۇرىلىس سالاسىنىڭ قارقىنى ايتارلىقتاي جوعارى ەكەنىن ايتتى.

"بىلتىر قۇرىلىس جۇمىستارىنىڭ كولەمى 12،5 پايىزعا ارتقان. پايدالانۋعا بەرىلگەن تۇرعىن ءۇي كولەمى 14،5 پايىزعا كوبەيگەن نەمەسە 15 ميلليون شارشى مەتر باسپانا تاپسىرىلعان. اۋىل شارۋاشىلىعى سالاسىنداعى ءوسىم 5،0 پايىزعا جەتكەن. تاۋ-كەن وندىرىسىندەگى تەمىر كەنى جانە وزگە دە پايدالى قازبالار بويىنشا ءوسىم ساقتالدى.

قاسىم-جومارت توقايەۆقا ەلىمىزدەگى سانيتارلىق-ەپيدەميولوگيالىق احۋال باقىلاۋدا ەكەنىن بايانداعان پرەمەر-مينيستر كۇندەلىكتى جاڭادان ىندەتكە شالدىققانداردىڭ سانى 0،46 پايىزعا وسكەنىن، ەلىمىز بويىنشا كوروناۆيرۋستىڭ ءورشۋ دەڭگەيىنىڭ كورسەتكىشى 0،9 پايىزدى قۇرايتىنىن جەتكىزدى. جۇقپالى اۋرۋلار اۋرۋحانالارىنىڭ 29 پايىزىندا، جانساقتاۋ بولىمدەرىنىڭ 21 پايىزىندا ادامدار ەمدەلىپ جاتىر" دەلىنگەن حابارلامادا.

پرەزيدەنتكە ينۆەستيسيا تارتۋ، حالىقتى جۇمىسپەن قامتۋ، الەۋمەتتىك ماڭىزى بار تاۋارلاردىڭ باعاسىن تۇراقتاندىرۋ جانە باسقا دا ەلدىڭ الەۋمەتتىك-ەكونوميكالىق دامۋىنداعى وزەكتى ماسەلەلەر بويىنشا قابىلدانعان شارالار جايىندا ەسەپ بەرىلدى.