25 جىلدان استام ۋاقىت بويى قىزمەت ەتكەن ۇستازدار "ماماندىعىنا ادالدىعى ءۇشىن" توسبەلگىسىمەن ماراپاتتالادى. بۇل تۋرالى ءبىلىم جانە عىلىم ءمينيسترى اسحات ايماعامبەتوۆ facebook پاراقشاسىندا جازدى.
مينيستر پەداگوگتەر مەن عىلىمي قىزمەتكەرلەر قانداي مەرەكەلەرگە سايكەس ماراپاتتالاتىنىن ايتتى.
– ماراپاتتاۋ راسىمدەرى "تاۋەلسىزدىك كۇنى"، "ءبىلىم كۇنى"، "مۇعالىمدەر كۇنى"، "عىلىم قىزمەتكەرلەرى كۇنى" مەرەكەلەرىنە ورايلاستىرىلادى. سونداي-اق جۇمىس توبى 25 جىلدان استام ۋاقىت بويى ۇستازدىق ەتكەن ارىپتەستەرىمىزدى "ماماندىعىنا ادالدىعى ءۇشىن" توسبەلگىسىمەن ماراپاتتاۋدى ۇسىندى. جىلدار بويى ادال ەڭبەك ەتكەن سالا ارداگەرلەرىن ماراپاتتاۋ ماڭىزدى دەپ سانايمىز، – دەيدى ايماعامبەتوۆ.
ونىڭ ايتۋىنشا، 25 جىلدان استام ۋاقىت بويى قىزمەت ەتكەن ۇستازدار "ماماندىعىنا ادالدىعى ءۇشىن" توسبەلگىسى ءۇشىن قۇجات تاپسىرماسا دا بولادى.
– جۇمىس توبىنىڭ پىكىرىنشە، شيرەك عاسىر جۇمىس ىستەگەن سالا ماماندارى ماراپاتتىڭ وسى ءتۇرىن الۋ ءۇشىن ەشقانداي قۇجات تاپسىرماسا دا بولادى. ماراپاتتاردى الۋدىڭ ناقتى جۇيەلىگى ەنگىزىلەدى. ءار ماراپاتتىڭ جەكە سايكەستەندىرۋ كودى بولادى. ول 12 ساننان قۇرالادى جانە ماراپاتتاۋ جىلىن، مەرەكە كۇنىن، ماراپاتتالعان ادام جۇمىس ىستەيتىن سالانى، كوتەرمەلەۋ ءتۇرىن جانە رەتتىك ءنومىرىن كورسەتەتىن بەس بولىمنەن تۇرادى. ەندى بارلىق ماراپاتتالۋشىلار بويىنشا ءمينيستردىڭ بۇيرىعى شىعادى. ول بۇيرىق مىندەتتى تۇردە كوتەرمەلەۋدىڭ ءبىرىڭعاي ەلەكتروندى ەسەبىندە ساقتالىپ، مينيسترلىكتىڭ ينتەرنەت-رەسۋرسىندا جاريالانادى، – دەدى مينيستر.
پىكىر قالدىرۋ