ءبىز ماراپاتتاردى تاعايىنداۋ ۇدەرىسىنىڭ بارىنشا وبەكتيۆتى، اشىق جانە مەريتوكراتيا قاعيداتتارىنا تولىعىمەن سايكەس بولۋىنا ۇمتىلامىز. وسى ماقساتتا ءبىلىم جانە عىلىم مينيسترلىگىنىڭ ۆەدومستۆولىق ناگرادالارى مەن ماراپاتتاۋ جۇيەسىنە قاتىستى جاڭا وزگەرىستەردى ەنگىزۋگە نەگىز بولاتىن بۇيرىق دايىندادىق. بۇل مينيسترلىك تاراپىنان ۇسىنىلاتىن ديپلومدارعا، گراموتالارعا، توسبەلگىلەر مەن العىس حاتتارعا قاتىستى ماسەلە. ارىپتەستەرىمنىڭ اراسىندا اتالعان ماراپاتتاردى بەرۋدىڭ وبەكتيۆتىلىگىنە قاتىستى بىرنەشە رەت سۇراقتار تۋىنداعانىن جاسىرمايمىن. وسىعان بايلانىستى بارلىق كۇماندى جويۋ ءۇشىن ءبىز پەداگوگتەر، وقۋ ءىسىنىڭ مەڭگەرۋشىلەرى، مەكتەپ ديرەكتورلارى، ادىسكەرلەردەن تۇراتىن جۇمىس توبىن قۇردىق. بۇيرىققا ەنگىزىلگەن ۇسىنىستاردى دا ءدال وسى جۇمىس توبى ازىرلەدى. بۇل قۇجاتتىڭ بۇعان دەيىن قولدانىستا بولعان بۇيرىقتان ايىرماشىلىعى ايتارلىقتاي كوپ، – دەپ جازدى مينيستر.

 

ماراپاتتاردى بەرۋگە قاتىستى قويىلعان جاڭا تالاپتار بار.

 

"قويىلعان جاڭا تالاپتاردىڭ بىرنەشەۋىن اتاپ وتەيىن:

– جۇمىس كورسەتكىشتەرىنىڭ ناقتى تىزبەسى كورسەتىلەدى؛

– كورسەتكىشتەر ماڭىزدىلىعىنا قاراي ءارتۇرلى بالمەن باعالانادى، باسەكەلەستىك بولۋى ءۇشىن ماراپات كوپ بالل جيناعان ادامعا بەرىلەدى؛

– كوتەرمەلەۋدىڭ جاڭا تۇرلەرى ەنگىزىلەدى (دەڭگەي بويىنشا ءبىلىم بەرۋ ءىسىنىڭ ۇزدىگى قۇرمەت گراموتاسى)؛

– ماراپاتتاۋ رەتتىلىكپەن بەرىلەدى (بىردەن ەڭ جوعارى ماراپات بەرىلمەيدى، رەتتىلىك ساقتالۋى ءتيىس)؛

– ماراپات الاتىن تۇلعالار بويىنشا اقپارات سيفرلاندىرىلۋى، ەسەپكە الىنۋى جانە اشىقتىق قامتاماسىز ەتىلۋى ءتيىس.

 

اتالعان بۇيرىققا سايكەس ماراپاتتاردى تاعايىنداۋ ءتارتىبى ناقتى رەتكە كەلتىرىلگەن. مۇنىڭ بارلىعى ماراپاتقا ۇمىتكەرلەردى ءادىل جانە اشىق ىرىكتەۋگە، سۋبەكتيۆتى تاۋەكەلدەردى ايتارلىقتاي ازايتۋعا باعىتتالعان. جاڭا تالاپتار ەلىمىزدەگى پەداگوگتەر مەن عالىمداردى وبەكتيۆتى ءارى اشىق ماراپاتتاۋ ءتارتىبىن قامتاماسىز ەتۋگە مۇمكىندىك بەرەدى دەپ سانايمىز. ۇمىتكەرلەردىڭ جۇمىس ەرەكشەلىگىن ەسكەرە وتىرىپ، ولاردىڭ قانداي دا ءبىر ماراپاتقا يە بولۋ مۇمكىندىگىن تەڭەستىرۋ ءۇشىن ءبىز مەكتەپكە دەيىنگى، باستاۋىش، ورتا، ورتا بىلىمنەن كەيىنگى ءبىلىم بەرۋ، تجكب پەداگوگتەرىن، جوو وقىتۋشىلارى مەن عىلىمي قىزمەتكەرلەردى سارالاۋ بويىنشا شەشىم قابىلدادىق. وسىلايشا، مۇعالىمدەردىڭ نەمەسە عالىمداردىڭ ءار جەكە ساناتىندا باسەكەلەستىك بولادى. جىل سايىن ءبىزدىڭ باستامامىز بويىنشا پەداگوگتەر مەن عىلىمي قىزمەتكەرلەردىڭ نورمالانعان سانى ماراپاتتالاتىن بولادى. بۇل رەتتە باسشىلىق مىندەتتەرىن اتقاراتىن ازاماتتار سانى (ديرەكتورلار، مەڭگەرۋشىلەر جانە ت.ب.) 20 پايىزدان اسپاۋى ءتيىس" دەلىنگەن ءمينيستردىڭ الەۋمەتتىك جەلىدەگى جازباسىندا.