بەلگىلى سپورتشى دەنيس تەننىڭ قازاسىنا بايلانىستى قوزعالعان قىلمىستىق ىستەگى ايىپتالۋشىلاردىڭ ءبىرى جانار تولىبايەۆاعا قاتىستى جازا ءتۇرى وزگەرتىلىپ، وتەلمەگەن مەرزىم باس بوستاندىعىن شەكتەۋ جازاسىنا الماستىرىلدى. بۇل تۋرالى Tengrinews.kz سايتى ءتىلشىسىنىڭ رەسمي ساۋالىنا جوعارعى سوت اپپاراتى جولداعان حاتتا حابارلانعان.
قىلمىستىق كودەكستىڭ 73-بابىنا سايكەس جانار تولىبايەۆا وتەلمەگەن جازا مەرزىمىن جەڭىل جازا تۇرىنە الماستىرۋ بويىنشا تالاپ ارىز تۇسىرگەن.
"الماتى وبلىسى ىلە اۋداندىق سوتىنىڭ قاۋلىسىنا سايكەس، 2020 جىلعى 6 قاڭتاردا تالاپ ارىز قاناعاتتاندىرىلعان. جازا مەرزىمىنىڭ وتەلۋىن باقىلاۋ پروباسيا قىزمەتىنە تاپسىرىلعان" دەلىنگەن اپپارات جاۋابىندا.
سونداي-اق جابىرلەنۋشى دەنيس تەننىڭ اناسى – وكسانا تەن دە سوت اكتىلەرىن قايتا قاراۋ تۋرالى تالاپ ارىز تۇسىرگەن. الايدا جوعارعى سوت ونى قاناعاتتاندىرماعان. وكسانا تەن ايىپتالۋشى "جانار تولىبايەۆا قىلمىسقا تىكەلەي قاتىسى بار بولۋى مۇمكىن"، ءتىپتى "قىلمىستى جاساۋ كەزىندە جەتەكشى رول اتقارعان بولۋى ىقتيمال" دەپ سانايدى.
دەنيس تەننىڭ قازاسىنا ايىپتالعان ارمان قۇدايبەرگەنوۆ پەن نۇرالى قياسوۆ 18 جىلعا، جانار تولىبايەۆا 4 جىلعا باس بوستاندىعىنان ايىرىلعان ەدى.
پىكىر قالدىرۋ