الماتىدا ەسىرتكى كونترابانداسىمەن كۇرەستىڭ الەمدىك تاريحىنداعى كولەمى جاعىنان ەكىنشى گەروين پارتياسى جويىلدى. بۇل تۋرالى قارجى مونيتورينگى كوميتەتى حابارلادى.

الماتى قالاسى بويىنشا ەكونوميكالىق تەرگەۋ دەپارتامەنتىنىڭ قىزمەتكەرلەرى جەتىسۋ كولىك پروكۋراتۋراسىنىڭ ۇيلەستىرۋى جانە ارنايى كوميسسيانىڭ قاتىسۋىمەن جالپى سالماعى 1،1 توننادان اساتىن گەرويننىڭ اسا ءىرى پارتياسىن جويعان.

"ەسىرتكىنى كوميتەت قىزمەتكەرلەرى گەرمانيانىڭ قىلمىستىق كەدەن پوليسياسىمەن بىرلەسىپ، سونداي-اق رەسەي، بەلارۋس، ليتۆا، پولشا جانە نيدەرلاندى قۇقىق قورعاۋ جانە كەدەن قىزمەتتەرىنىڭ كومەگىمەن وتكىزگەن حالىقارالىق ارنايى وپەراسيا ناتيجەسىندە تاركىلەگەن.

وسىلايشا، 2019 جىلدىڭ قازان ايىندا قازاقستان اۋماعىنا "وڭدەلگەن ءمارمار" دەگەن اتاۋمەن جۇك اكەلىندى. نيدەرلاندىعا جونەلتىلگەن تاۋاردى تەكسەرۋ كەزىندە تەرگەۋشىلەر گەروين بار 2208 بريكەتتى انىقتادى. ۇيىمداسقان قىلمىستىق توپ ەسىرتكى ءترانزيتىن يراننان ەۋروپالىق وداق ەلدەرىنە وتكىزۋدى جوسپارلاعان.

اتالاعان ەسىرتكىنىڭ ءبىر بولىگى، قارجى مونيتورينگ قىزمەتكەرلەرىنىڭ باقىلاۋىمەن گەرمانياعا جەتكىزىلدى، مۇندا تاۋاردى الۋ كەزىندە، تۇركيا ەلىنىڭ ازاماتتارى ۇستالعان بولاتىن.

قازىرگى ۋاقىتتا اتالعان ءىس بويىنشا قىلمىستىق كودەكستىڭ 286-بابى 4-بولىگى بويىنشا سايكەس سوتقا دەيىنگى تەرگەۋ امالدارى جۇرگىزىلۋدە (ەسiرتكi، پسيحوتروپتىق زاتتارمەن، سول تەكتەستەرمەن بايلانىستى اينالىستان الىپ قويىلعان زاتتاردىڭ نەمەسە اينالىسى شەكتەلگەن زاتتاردىڭ اسا iرi مولشەردە جاسالعان كونترابانداسى).