الماتىدا جارىلعىش زات (گرانات) تابىلىپ، پوليسيا اينالاسىندا ورنالاسقان جەكە سەكتورداعى ۇيلەردى قورشاۋعا الدى. كەيىنىرەك تابىلعان گرانات جاۋىنگەرلىك ەمەس بولىپ شىقتى. بۇل تۋرالى Tengrinews.kz سايتى حابارلادى.

وقيعا ەكى كۇن بۇرىن بولعان. ينتەرنەتتە وقيعا ورنىنداعى ۆيدەو جاريالاندى. كادرلاردان وقيعا ورنىندا پوليسيا جۇمىس ىستەپ جاتقانى كورىنەدى. 

الماتى پوليسيا دەپارتامەنتىنىڭ حابارلاۋىنشا، وقيعا ناۋرىزباي اۋدانىندا بولعان.

– تابىلعان گرانات جاۋىنگەرلىك ەمەس. ونىڭ ناقتى شىعۋ تەگى مەن سايكەستىگى ارنايى ساراپتاما ناتيجەلەرى بويىنشا انىقتالادى. بۇل فاكت سوتقا دەيىنگى تەكسەرۋدىڭ ءبىرىڭعاي تىزىمىندە 287-باپتىڭ 3-بولىگى بويىنشا "قارۋدى، وق-دارىلەردى، جارىلعىش زاتتاردى زاڭسىز الۋ، بەرۋ، ساتۋ، ساقتاۋ، تاسىمالداۋ نەمەسە الىپ ءجۇرۋ" بويىنشا تىركەلگەن، –  دەپ حابارلادى قالالىق ءىىد باسپا ءسوز قىزمەتى.

بۇعان دەيىن 5 قاڭتاردا الماتىدا پوليسەيلەر دوستىق داڭعىلى مەن وسپانوۆ كوشەسى ايماعىن قورشاۋعا العان بولاتىن. كۋاگەرلەردىڭ ايتۋىنشا، سول جەردە كريميناليستەر، ءورت سوندىرۋشىلەر، دارىگەرلەر، ءتىپتى اسكەري ادامدار بولعان. كەيىنىرەك الماتى قالاسى دپ-نىڭ باسپا ءسوز قىزمەتى وقيعاعا قاتىستى تۇسىنىكتەمە بەردى. "5 قاڭتاردا ساعات 16.45-تە الماتى پوليسيا دەپارتامەنتىنىڭ جەدەل باسقارۋ ورتالىعىنا دوستىق داڭعىلىنداعى ايالدامادان گراناتاعا ۇقساس زات تابىلعانى تۋرالى ۇرەيلى حابارلاما ءتۇستى" دەلىنگەن.