ءبىلىم جانە عىلىم ءمينيسترى اسحات ايماعامبەتوۆ ءبىلىم بەرۋ ماسەلەلەرى بويىنشا زاڭناماعا ەنگىزىلگەن جاڭا وزگەرىستەر تۋرالى تولىعىراق تارقاتىپ ايتتى.
– ەندى ستۋدەنتتەردىڭ دۋالدى جۇيەسى ارقىلى ءبىلىم العان مەرزىمى ەڭبەك ءوتىلى رەتىندە ەسەپتەلەتىن بولادى. بۇل كوللەدج تۇلەكتەرىنىڭ جۇمىسقا ايتارلىقتاي تاجىريبەمەن ورنالاسۋ مۇمكىندىگىن ارتتىرادى. بەكىتىلگەن زاڭناماعا سايكەس ۋاكىلەتتى ورگاننىڭ كوللەدجدەردە وقۋ مەرزىمدەرىن بەلگىلەۋى تۋرالى نورما الىنىپ تاستالدى. ەندى وقۋ ۇزاقتىعى ناقتى ءبىلىم بەرۋ باعدارلاماسىنا جانە قاجەتتى وقۋ ناتيجەلەرىنە بايلانىستى بولادى، – دەدى ول.
مينيستر كوللەدج وكىلدەرى كوتەرگەن تاعى ءبىر ماسەلە شەشىمىن تاپقانىن ايتتى.
– ەندى كوللەدجدەر اقىلى نەگىزدە قىزمەت كورسەتىپ، وقۋ-وندىرىستىك شەبەرحانالاردا، شارۋاشىلىقتاردا، وقۋ پوليگوندارىندا دايىنداعان تاۋارلارىن ساتا الادى. ماسەلەن، "دانەكەرلەۋ ءىسى" ماماندىعى بويىنشا وقيتىن ستۋدەنتتەر پراكتيكا كەزىندە تەمىردەن ساپالى كونسترۋكسيالار جاسايدى، جاس كونديتەرلەر كەرەمەت ونىمدەر پىسىرەدى، قولونەر باعىتىنداعى ماماندىقتارى بويىنشا وقيتىن ستۋدەنتتەر كيىزدەن، كەراميكادان، اعاشتان، بىلعارىدان، زەرگەرلىك بۇيىمداردان اۆتورلىق بۇيىمدار دايىندايدى. وقۋ تاجىريبەسى كەزىندە ستۋدەنتتەر دايىنداعان ونىمدەردى ساتۋعا رۇقسات بەرۋ ارقىلى وندىرىستىك وقىتۋدىڭ ساپاسىن ارتتىرۋعا بولادى.
قازىرگى ۋاقىتتا جوعارى وقۋ ورىندارىنا قاراستى ءبىراز كوللەدجدەر جۇمىس ىستەيدى، ءبىراق قولدانىستاعى زاڭناماعا سايكەس ول وقۋ ورىندارى بيۋدجەت ەسەبىنەن كادرلاردى دايارلاۋ ءۇشىن مەملەكەتتىك تاپسىرىس الا المايدى. جاڭا تۇزەتۋلەرگە سايكەس بۇل ماسەلە وڭ شەشىمىن تاپتى. مەملەكەتتىك تاپسىرىستى الۋ ءۇشىن كوللەدجدەردىڭ اككرەديتتەۋدەن وتۋىنە قاتىستى تالاپتار الىنىپ تاستالدى، – دەپ اتاپ ءوتتى ايماعامبەتوۆ.
پىكىر قالدىرۋ