الماتى وبلىسى تالعار اۋداندىق اۋرۋحاناسىنىڭ باس دارىگەرى نۇرلان قۇلسەيىتوۆ قايتىس بولدى، دەپ حابارلادى ازاتتىق رۋحى سايتى.

سايت مالىمەتىنشە، 62 جاستاعى دارىگەر 2020 جىلعى 30 جەلتوقسانىنان باستاپ كوروناۆيرۋستان ەمدەلگەن. الايدا ارادا 18 كۇن وتكەندە نۇرلان قۇلسەيىتوۆ جان تاپسىردى.

– نۇرلان قۇلسەيىتوۆتىڭ قوس وكپەسى دە قابىنعان، وكپەسىنىڭ 90-95% كۇيگەن... قاتەلەسپەسەم، باس دارىگەر شامامەن 9 جىل بۇرىن كولىك اپاتىنا ۇشىراپ، ارەڭ امان قالعان. ەندى باس دارىگەردىڭ مىندەتىن ۋاقىتشا ەربول سارسەنبايەۆ اتقارا تۇرادى، – دەدى تالعار اۋدانى اكىمىنىڭ ورىنباسارى احمەت ءاشىماحۋن.

نۇرلان عابباس ۇلى الماتى مەملەكەتتىك مەديسينا ينستيتۋتىنىڭ ەمدەۋ فاكۋلتەتىن ۇزدىك بىتىرگەن. ەڭبەك جولىن 1984 جىلى باستاعان. ول اۋداندىق اۋرۋحانانى 2005 جىلدان بەرى باسقارعان.

ەسكە سالساق، بۇعان دەيىن باس دارىگەر نۇرلان عابباس ۇلىنىڭ ناۋقاستىڭ سۇراعىنا جاۋاپ بەرۋ كەزىندە ۇستەلدى ۇرعان ۆيدەوسى الەۋمەتتىك جەلىدە تاراعان.