سەمەي قالاسىنا جاڭا اكىم تاعايىندالدى. بۇل تۋرالى شىعىس قازاقستان وبلىسى اكىمدىگىنىڭ باسپا ءسوز قىزمەتى حابارلادى.

"شىعىس قازاقستان وبلىسى اكىمى دانيال احمەتوۆتىڭ وكىمىمەن سەمەي قالاسىنىڭ جاڭا اكىمى تاعايىندالدى. بۇگىن قالالىق ءماسليحاتتىڭ كەزەكتەن تىس ءىى سەسسياسىندا دەپۋتاتتار كوپشىلىك داۋىسپەن نۇرىمبەت ساقتاعانوۆتىڭ كانديداتۋراسىن قولدادى. ايتا كەتەيىك، ول بۇعان دەيىن ۇلان اۋدانىنىڭ اكىمى قىزمەتىن اتقارعان بولاتىن" دەلىنگەن حابارلامادا.

جاڭا قالا باسشىسىن اكتيۆكە دانيال احمەتوۆ تانىستىردى. بۇرىنعى اكىم ەرماك ءسالىموۆ وبلىس اكىمىنىڭ تۇرعىن ءۇي-قۇرىلىس ماسەلەلەرى جونىندەگى كەڭەسشىسى بولادى.

نۇرىمبەت امان ۇلى ساقتاعانوۆ 1970 جىلى 6 تامىزدا وڭتۇستىك قازاقستان وبلىسىندا دۇنيەگە كەلگەن. قىزىلوردا پەداگوگيكالىق ينستيتۋتىن، قىزىلوردا اگرارلىق-تەحنيكالىق كوللەدجىن، مەسا ديستانسيالىق ءبىلىم بەرۋ ينستيتۋتىن، مەسا قىزىلوردا ەكونوميكا، ستاتيستيكا جانە اقپارات ينستيتۋتىن، س. امانجولوۆ اتىنداعى شىعىس قازاقستان مەملەكەتتىك ينستيتۋتىن ءمۇعالىم، زاڭگەر، ەكونوميكا جانە بيزنەس ماماندىقتارى بويىنشا ءتامامداعان.

ەڭبەك قىزمەتىن 1992 جىلى قىزىلورداداعى № 172 ورتا مەكتەبىندە ءمۇعالىم بولىپ باستاعان.1993-1994 جىلدارى ق ر قك قاتارىندا بولىپ، اسكەردەن كەيىن قىزىلورداداعى № 9 ورتا مەكتەپتە جۇمىسىن جالعاستىردى.

1995-2001 جىلدارى قىزىلوردا وبلىسى بويىنشا كەدەن باسقارماسىنىڭ ينسپەكتورى، اعا ينسپەكتورى، باس ينسپەكتورى، ءبولىم باستىعى، ءبولىم باستىعىنىڭ ورىنباسارى بولىپ جۇمىس ىستەدى.

2001-2006 جىلدارى - مەملەكەتتىك كىرىس مينيسترلىگى كەدەن كوميتەتىندە باس ينسپەكتور، ءتوراعانىڭ كومەكشىسى، ءبولىم باستىعى (قارجى مينيسترلىگىنىڭ كەدەن كوميتەتى، كەدەن باقىلاۋ اگەنتتىگى) بولدى.

2006-2007 جىلدارى - ق ر پارلامەنتىندەگى ۇكىمەت وكىلدىگىنىڭ باس ينسپەكتورى، ەكونوميكا جانە بيۋدجەتتىك جوسپارلاۋ مينيسترلىگىندە ءبولىم باستىعى، ءمينيستردىڭ كەڭەسشىسى قىزمەتىن اتقاردى.

2007-2010 جىلدارى ەڭبەك جانە حالىقتى الەۋمەتتىك قورعاۋ مينيسترلىگىنىڭ كوشى-قون كوميتەتى ءتوراعاسىنىڭ ورىنباسارى بولدى.

2010-2012 جىلدارى قازاقستاننىڭ پرەزيدەنتى اكىمشىلىگىنىڭ مەملەكەتتىك باقىلاۋ جانە اۋماقتىق-ۇيىمداستىرۋ جۇمىسى ءبولىمىنىڭ مەملەكەتتىك ينسپەكتورى.

2012-2015 جىلدارى شىعىس قازاقستان وبلىسى اكىمىنىڭ ورىنباسارى قىزمەتىن اتقاردى.

2015-2018 جىلدارى شىعىس قازاقستان وبلىسى اكىمىنىڭ ءبىرىنشى ورىنباسارى بولدى.

2018 جىلدان بۇگىنگە دەيىن ۇلان اۋدانى اكىمى قىزمەتىن اتقاردى.
ايتا كەتەيىك، جاڭا اكىم نۇرىمبەت امان ۇلى جەتى بالا تاربيەلەپ وتىرعان كوپبالالى اكە.