جۇڭگو حالىق رەسپۋبليكاسىنىڭ ءتوراعاسى سي سزينپين الەمدىك ەكونوميكالىق فورۋمدا بايدەن ترامپتىڭ قىتايعا قاتىستى ساياساتىن جالعاستىراتىن بولسا، سوعىس باستالاتىنىن ەسكەرتتى.
سي سزينپين كوروناۆيرۋس سالدارىنان بولعان ەكونوميكالىق داعدارىستان شىعۋ جولىن ۇسىنۋ ارقىلى پاندەميانى سىلتاۋراتىپ ءبولىنۋ مەن وقشاۋلانۋ ءۇشىن قولدانىلماۋى قاجەت ەكەنىن ايتتى.
جۇڭگو باسشىسى دجو بايدەننىڭ ەسىمىن اتاماسا دا، اقش-تى دا اۋىزعا الماسا دا ءسوزى ارقىلى جۇڭگو ۆاشينگتوننىڭ ىرقىنا كونبەيتىنىن جەتكىزدى.
– سوعىس اشۋ، باس تارتۋ، بىرەۋگە قوقان-لوقى كورسەتۋ، قورقىتۋ، سانكسيا سالۋ مەن تاۋار جەتكىزۋدى توقتاتۋ الەم داعدارىسىنا اكەلىپ سوعادى. ەشبىر ەل ءوز بەتىنشە الەمدىك دەڭگەيدەگى ماسەلەنى شەشە المايدى. ماسەلەنى شەشۋ ءۇشىن بولىنبەۋىمىز قاجەت، – دەدى سي سزينپين.
سي سزينپين قىتايداعى ۇيعىرلار مەن گونكونگتا بولعان وقيعاعا بايلانىستى دونالد ترامپتىڭ حاتشىسى مايك پومپەونىڭ "گەنوسيد جاسادى" دەگەن ايىپتاۋىن دا قابىلدامايتىنىن جەتكىزدى.
– الەمدە مادەنيەتى، تاريحى، الەۋمەتتىك جۇيەسى بىردەي ەل جوق. ءار مەملەكەتتىڭ ەرەكشەلىگى بار. ەشقايسىسى بىر-بىرىنە ۇقسامايدى. ەلدەردىڭ ءارتۇرلى بولۋى دابىل قاعۋعا سەبەپ ەمەس. جەككورۋشىلىك سەزىمى، تاكاپپارلىق، ءوز مادەنيەتىن، تاريحىن، الەۋمەتتىك جۇيەسىن تاڭۋ دابىل قاعۋعا تۇرادى، – دەپ ءسوزىن قورىتىندىلادى سي سزينپين.
پىكىر قالدىرۋ