ءبىلىم جانە عىلىم مينيسترلىگىنىڭ جالپى وتىرىسىندا مينيستر اسحات ايماعامبەتوۆ جوعارى وقۋ ورىندارىنداعى عىلىم سالاسى بويىنشا ماسەلەردى ايتتى.
– مەملەكەت باسشىسى عىلىم سالاسىن دامىتۋ ماسەلەسىن ەرەكشە نازاردا ۇستاپ وتىرعانىن جاقسى بىلەسىزدەر. عىلىم سالاسىن قارجىلاندىرۋ بويىنشا دا، باسقا ماسەلەلەر بويىنشا دا ۇلكەن كومەك كورسەتىپ وتىر، ماسەلەلەر شەشىلىپ جاتىر. سوندىقتان بىزگە مۇنى دۇرىس يگەرىپ، دۇرىس جولعا قويىپ، جۇمىستى اشىقتىق قاعيداسىمەن ۇيىمداستىرۋ وتە ماڭىزدى. سوندىقتان وسى تۇرعىدا جۇمىسىمىزدى ءارى قاراي جالعاستىرامىز.
جوعارى وقۋ ورىندارى دا وسى جۇمىسقا بەلسەندى قاتىسۋعا ءتيىس. جينالىس كەزىندە رەكتورلارعا دا وسى ماسەلەنى ايتتىم. ءار فاكۋلتەتتە دەكانداردىڭ عىلىم جونىندەگى ورىنباسارلارى بار. كافەدرا دا عىلىممەن اينالىسادى، عىلىم بويىنشا ەسەبىن تاپسىرادى. عىلىم جونىندەگى پرورەكتورلار دا بار. ءبىراق وسىنىڭ ءبارى بولعاننان كەيىن جۇمىس تا، ناتيجە دە بولۋى كەرەك قوي. كوممەرسياليزاسيا كەڭسەلەرىن اشىپ قويدىق. ءبىراق سونىڭ مازمۇنى قايدا؟ وسى ماسەلەلەرگە ەرەكشە نازار اۋدارىپ، ءبىزدىڭ جوعارى وقۋ ورىندارى وسى جۇمىستى بەلسەندى ورىنداۋى كەرەك، – دەدى مينيستر.
مينيستر بيىل عىلىم سالاسىنداعى سيفرلاندىرۋ ماسەلەسىن، پوستدوكتورانتۋرا ماسەلەسىن شەشۋ قاجەت ەكەنىن اتاپ ايتتى.
– بيۋروكراتيالىق كەدەرگىلەردى جويۋ كەرەك. باسقارۋ جۇيەسىندە دە ءارتۇرلى بيۋروكراتيالىق كەدەرگى كوپ. ونى وزدەرىڭىز بىلەسىزدەر. ءبىز ءبىرازىن جويىپ، الىپ تاستادىق. ءبىراق دەسەك تە، ءالى بار. بىزگە كەرەگى: عىلىممەن اينالىساتىن ارىپتەستەرىمىزگە تەك ءوز جۇمىسىمەن اينالىسۋعا جاعداي جاساۋ. ءارتۇرلى قاعازباستىلىق، ءارتۇرلى ەسەپ بەرۋ، دەڭگەيلەردەن ءوتۋ دەگەندەردىڭ ءوزى ارينە، ۇلكەن كەدەرگى. وسىنى دا ءبارىن بيىل شەشۋىمىز كەرەك.
كادر دايارلاۋ ماسەلەسىنە دە كوميتەت كوڭىل اۋدارۋى كەرەك. زەرتحانالاردى دامىتۋ بويىنشا ۇلكەن باعدارلاما باستالدى، – دەدى ايماعامبەتوۆ.
پىكىر قالدىرۋ