ارالاس جەكپە-جەك شەبەرى قۋات حاميتوۆ ءوزىنىڭ جەكە پارتياسىن اشاتىنىن رەسمي تۇردە مالىمدەدى. بۇل تۋرالى ول الەۋمەتتىك جەلىدەگى پاراقشاسىندا جازدى.
– مەن ءوز پارتيامدى اشاتىنىمدى رەسمي تۇردە جاريالايمىن! نەگىزى مۇنى ىستەگىم كەلمەدى، ءبىراق مەنىڭ مەملەكەتىم بۇل پروسەستى تەزدەتتى. پارتيا بارىنە كىم كىنالى، كىم نە ىستەپ جاتىر دەگەن دۇنيەلەردى ايتۋ ءۇشىن ەمەس، حالىقتىڭ داۋىسىن ەستۋ ءۇشىن قۇرىلادى.
ءبىزدىڭ مەملەكەتتىڭ باستى پروبلەماسى – ولار حالىقتىڭ پىكىرىمەن ساناسپايدى جانە ءۇنىن ەستىمەيدى.
پارتيانىڭ اشىلۋىنا ەشقانداي كەدەرگى بولمايدى دەپ ۇمىتتەنەمىن، ويتكەنى ءبىز ەركىن ەلدە ءومىر سۇرەمىز. مەنىڭ ەسىگىم بارىنە اشىق! بارلىعىڭىز پارتياعا مۇشە بولا الاسىزدار، – دەپ جازدى ول.
ەسكە سالا كەتەيىك، 28 قاڭتاردا الماتى قالاسى المالى اۋدانىندا حاميتوۆتىڭ ءىسى بويىنشا سوت وتىرىسى وتكەن.
سوت سپورتشىنى قىلمىستىق كودەكستىڭ 272-بابى 3-بولىگى بويىنشا كىنالى دەپ تانىپ، 6 اي باس بوستاندىعىنان شەكتەۋ تۋرالى ۇكىم تاعايىنداعان.
بۇعان دەيىن قۋات حاميتوۆ 2020 جىلدىڭ قىركۇيەك ايىندا الەۋمەتتىك جەلىدە بيلىككە قارسى كۇش قولدانىپ، بيلىك وكىلدەرىنە باعىنباۋعا شاقىرعان ۆيدەوسى ءۇشىن سوتقا شاقىرىلعان بولاتىن.
پوسموترەت ەتۋ پۋبليكاسيۋ ۆ Instagram
پىكىر قالدىرۋ