Mash Telegram ارناسىنىڭ جۋرناليستەرى رەسەيلىك وپپوزيسيونەر الەكسەي ناۆالنىي "پۋتيندىكى" دەگەن گەلەندجيك قالاسىنداعى ءزاۋلىم سارايعا باردى.
سيۋجەت اۆتورىنىڭ ايتۋىنشا، ونىڭ گيدى تەحنيكالىق قاداعالاۋشىلاردىڭ ءبىرى رەتىندە التى جىل بويى عيماراتتىڭ سالىنۋىن باقىلاعان. گيد ساراي تۋرالى رەفورتاجعا تۇسۋگە كونبەي، اقىرى ءوزى حابارلاسىپ، كەلىسىمىن بەرگەن. نىساننىڭ ءىشى-سىرتىن تولىق تۇسىرۋگە ءبىر ساعات قانا ۋاقىت بولعان.
"سارايعا كەلگەندەردى قاقپاسى جوق كىرەبەرىس قارسى الادى. قىسقى سارايدا ءتاج بار، ءبىراق ناۆالنىي ۆيدەوسىندا كورسەتىلگەندەي پاتشا بۇركىتىنىڭ كوشىرمەسى جوق. ورنالاسقان جەردى سيپاتتاۋ قيىن ەمەس. اينالانىڭ ءبارى بەتون. قۇرىلىستىڭ باستاپقى كەزەڭى" دەگەن ۆيدەو اۆتورى عيماراتتا قۇرىلىس قىزۋ ءجۇرىپ جاتقانىن، ەشتەڭەنىڭ تولىق بىتپەگەنىن كورسەتكەن.
قۇرىلىسشىلاردىڭ ايتۋىنشا، عيمارات شامامەن بەس-التى جىلدان كەيىن اياقتالادى.
جۋرناليستەر عيماراتتىڭ قولدانىلۋ ماقساتى مەن يەسىنىڭ كىم ەكەنىن ءبىلۋ مۇمكىن بولماعانىن ءمالىم ەتتى.
پىكىر قالدىرۋ