پرەزيدەنت قاسىم-جومارت توقايەۆ رەفورمالار جونىندەگى جوعارعى كەڭەستىڭ ءۇشىنشى وتىرىسىندا ۇكىمەتكە الداعى حالىق ساناعىنا قاتىستى ءبىرقاتار تاپسىرما جۇكتەدى.
مەملەكەت باسشىسى حالىق ساناعى تۇرعىنداردىڭ ناقتى سانىن، ونىڭ جاس جانە گەندەرلىك قۇرامىن، ۋربانيزاسيا دەڭگەيىن، تابىس كولەمى مەن باسقا دا ماڭىزدى تالداۋ دەرەكتەردى انىقتاپ، تەكسەرىلگەن ءارى دايەكتى باسقارۋشىلىق شەشىمدەر قابىلداۋعا مۇمكىندىك بەرەتىنىن اتاپ ءوتتى.
توقايەۆ اتالعان شارادان مەيىلىنشە مول ماعلۇمات الۋ ءۇشىن ساۋالنامانىڭ مازمۇنىنا كوڭىل ءبولۋ قاجەت ەكەنىن ايتتى.
بۇل رەتتە پرەزيدەنت ازاماتتارعا اسا كوپ ساۋال قويماۋدى جانە ساناقتى وتكىزۋدىڭ وڭتايلى جولدارىن پايدالانۋدى، ونىڭ ىشىندە، پاندەميانىڭ تارالۋىنا جول بەرمەۋگە بايلانىستى شەكتەۋلەردى ەسكەرە وتىرىپ، سيفرلىق تەحنولوگيالاردى كەڭ قولدانعان ءجون دەپ سانايدى.
قاسىم-جومارت توقايەۆ ۇكىمەتكە پرەمەر-مينيستردىڭ ءبىرىنشى ورىنباسارىنىڭ توراعالىعىمەن ارنايى جۇمىس توبىن قۇرۋدى تاپسىردى.
اتالعان توپ ۇيىمداستىرۋ جانە نەگىزگى ماسەلەلەردى شەشۋمەن، سونداي-اق، دايىندىق جۇمىستارىن ۇيلەستىرىپ، ونى ىسكە اسىرۋمەن اينالىسادى.
ايتا كەتەيىك، ۇلتتىق ساناق وسى جىلدىڭ قازان ايىندا وتكىزىلىپ، ال 2022 جىلدىڭ ورتاسىنا قاراي ۇكىمەت ناقتى مالىمەتتەردى جاريالاۋى ءتيىس.
پىكىر قالدىرۋ