ۇكىمەت پرەزيدەنت قاسىم-جومارت توقايەۆقا 2025 جىلعا دەيىنگى ۇلتتىق دامۋ جوسپارىن ۇسىندى. بۇل تۋرالى اقوردا سايتى حابارلادى.
رەسمي سايتتىڭ مالىمەتىنە سۇيەنسەك، ۇكىمەت ۇسىنعان 2025 جىلعا دەيىنگى ۇلتتىق دامۋ جوسپارىنىڭ جوباسى 12 ستراتەگيالىق باعىتتان تۇرادى. ولار ينستيتۋسيونالدىق، ەكونوميكالىق جانە الەۋمەتتىك بولىپ 3 سالاعا بولىنگەن.
"دامۋ جوسپارى بويىنشا 2025 جىلعا قاراي ءوسىم دەڭگەيى 5 پايىزعا ارتىپ، جالپى ىشكى ونىمدەگى شاعىن جانە ورتا بيزنەستىڭ ۇلەسى 35 پايىزعا دەيىن، نەگىزگى كاپيتالعا تارتىلعان ينۆەستيسيالار كولەمى ءجىو-نىڭ 30 پايىزىنا دەيىن، شيكىزاتتىق ەمەس ەكسپورتتى 2 ەسەگە، ياعني، 41 ميلليارد تەڭگەگە دەيىن، ەڭبەك ونىمدىلىگىن 45 پايىزعا ۇلعايتۋ نەگىزگى كورسەتكىش بولماق.
قازاقستاندىقتاردىڭ تۇرمىس دەڭگەيى مەن ساپاسىن ارتتىرۋ جونىندەگى شارالاردىڭ ناتيجەسىندە ازاماتتاردىڭ ءومىر ءسۇرۋ ۇزاقتىعى 75 جاسقا دەيىن ۇلعايۋى ءتيىس" دەلىنگەن حابارلامادا.
سونداي-اق قازاقستاننىڭ حالىقارالىق رەيتينگتەردەگى دەڭگەيىن، اتاپ ايتقاندا، وقۋشىلاردىڭ ءبىلىم كورسەتكىشتەرى، سيفرلىق باسەكەگە قابىلەتتىلىك، زاڭ ۇستەمدىگى يندەكستەرى بويىنشا جاقسارتۋ جوسپارلانۋدا.
– ستراتەگيالىق كورسەتكىشتەردىڭ ەگجەي-تەگجەيلى كارتاسى – ۇلتتىق جوسپاردىڭ اجىراماس بولىگى. سوعان سايكەس ءاربىر مەملەكەتتىك ورگانعا جانە ءىرى كۆازيمەملەكەتتىك ۇيىمعا بەلگىلەنگەن كەزەڭدە قول جەتكىزۋگە ءتيىس ناقتى كورسەتكىشتەردىڭ تىزبەسى بەكىتىلەدى. كورسەتكىشتەردىڭ ناتيجەسى اقيقاتتان الىس بولماۋى كەرەك. دەگەنمەن وڭاي قول جەتەتىن جانە ىنتالاندىرمايتىن ينديكاتورلاردى ماقسات ەتۋگە بولمايدى، – دەدى جوسپارمەن تانىسقان پرەزيدەنت.
پرەزيدەنت اتالعان قۇجاتقا ۇلتتىق جوسپار بۇگىنگى جاھاندىق ۇردىستەردى ەسكەرە وتىرىپ، ەل دامۋىنىڭ نەگىزگى باعدارلارى مەن سيفرلىق پارامەترلەرىن قالىپتاستىراتىنىن اتاپ ءوتتى.
– ءبىزدىڭ باستى ماقساتىمىز – باسەكەگە قابىلەتتىلىك دەڭگەيىن ارتتىرۋ جانە الەمنىڭ دامىعان مەملەكەتتەرىنىڭ قاتارىنا كىرۋ، – دەدى توقايەۆ.
ۇلتتىق دامۋ جوسپارىنىڭ اياسىندا ۇسىنىلعان رەفورمالاردىڭ كوبىسى كاسىپكەرلىك، بيۋدجەتتىك جانە سالىق كودەكسى سياقتى زاڭنامالىق اكتىلەرگە وزگەرىستەر ەنگىزۋدى قاجەت ەتەتىنىن ەسكەرە وتىرىپ، مەملەكەت باسشىسى ۇكىمەتتىڭ پارلامەنتپەن كونسترۋكتيۆتى جۇمىس ىستەۋى قاجەت ەكەنىن اتاپ ءوتتى.
– دەپۋتاتتىق كورپۋس ۇلتتىق جوسپاردىڭ تابىستى جۇزەگە اسۋى ءۇشىن بارلىق قاجەتتى زاڭنامالىق بازانى قامتاماسىز ەتۋگە ءتيىس، – دەدى پرەزيدەنت.
