پرەمەر-مينيستر اسقار مامين جۇمىس ساپارىمەن ماڭعىستاۋ وبلىسىنا باردى، دەپ حابارلادى primeminister.kz سايتى.

رەسمي سايتتىڭ مالىمەتىنشە، ۇكىمەت باسشىسى ساپارى اياسىنداعى كەزدەسۋلەردە جاڭاوزەن قالاسىندا قۋاتتىلىعى 1 ملرد تەكشە مەترگە دەيىن بولاتىن جاڭا گاز وڭدەۋ زاۋىتىن سالۋ، ءوڭىردىڭ قولدانىستاعى ماگيسترالدىق جانە تاراتۋشى گاز جەلىلەرىن رەكونسترۋكسيالاۋ ماسەلەلەرى تالقىلانعان.

"ماڭعىستاۋ وبلىسىنىڭ حالقىن اۋىز سۋمەن قامتاماسىز ەتۋ شەڭبەرىندە "كاسپيي" تۇششىلاندىرۋ زاۋىتىن قايتا جاڭارتۋ جانە كەڭەيتۋ (ونىمدىلىگى تاۋلىگىنە 40 مىڭ تەكشە مەترگە دەيىن ارتتىرىلاتىن بولادى)، "قاراجانباس" قۋاتىن تاۋلىگىنە 17 مىڭ تەكشە مەترگە ۇلعايتۋ، جاڭاوزەن قالاسىن سۋمەن قامتاماسىز ەتۋ ماسەلەلەرىن شەشەتىن جانە قۋاتى تاۋلىگىنە 50 مىڭ تەكشە مەترگە جەتەتىن "كەندىرلى" تۇششىلاندىرۋ زاۋىتىن سالۋ جۇزەگە اسىرىلادى. قوسىمشا سۋمەن جابدىقتاۋ مەن كارىزدىڭ جاڭا جەلىلەرى سالىنادى، كتق قايتا جاڭارتىلىپ، جالپى قۋاتى تاۋلىگىنە 70 مىڭ تەكشە مەترگە دەيىن جەتكىزىلەدى" دەلىنگەن حابارلامادا.

سونداي-اق ماڭعىستاۋ وبلىسى حالقىنىڭ جۇمىسپەن قامتىلۋىن قامتاماسىز ەتۋ جانە تابىسىن ارتتىرۋ، ەڭبەك نارىعىنىڭ قازىرگى جاعدايىن ەسكەرە وتىرىپ، تۋريستىك سەكتور ءۇشىن جەرگىلىكتى كادرلاردى دايارلاۋ ماسەلەلەرى تالقىلانعان.

– جاڭا جۇمىس ورىندارىن قۇرۋعا، حالىقتىڭ تۇرمىس ساپاسى مەن ءال-اۋقاتىن ارتتىرۋعا ىقپال ەتەتىن دامۋدىڭ جاڭا جوبالارىنا ينۆەستيسيا تارتۋ كولەمىن ۇلعايتۋ قاجەت، –  دەدى ا. مامين.

جۇمىس ساپارى اياسىندا ۇكىمەت باسشىسى اقتاۋ قالاسىنىڭ كۋرورتتىق ايماعىن دامىتۋ جوبالارىنىڭ (Fairmont، Double Tree by Hilton، Aqualina Resort برەندتەرىمەن قوناق ۇيلەر، تاقىرىپتىق ويىن-ساۋىق پاركى) ىسكە اسىرىلۋىن تەكسەرىپ، جوسپارلانعان ينفراقۇرىلىم قۇرىلىسىنىڭ ۋاقىتىلى اياقتالۋىن قامتاماسىز ەتۋدى تاپسىردى.