الەۋمەتتىك جەلىدە ءوزىن "ارتەم، رۋدنىي قالاسىنانمىن" دەپ تانىستىرعان ادام رەسەي دۋماسى دەپۋتاتتارىنىڭ قازاقستان جەرى تۋرالى ايتقان داۋلى مالىمدەمەلەرى مەن مۇنداي دەپۋتاتتارعا ءىشى جىليتىن قازاقستاندىقتار تۋرالى نە ويلايتىنىن جەتكىزگەن ۆيدەو تاراپ جاتىر.

– الدەبىر كىرەبەرىستەردە ايتىلىپ جاتقان اڭگىمەلەرگە قاتىستى بىلاي دەگىم كەلەدى: قازاقتار، سىزدەر بىزگە باۋىرسىزدار. ورىستاردىڭ بارلىعى ونداي ەمەس. انت بەرگەن، سول انتىنا ادال دۇرىس جىگىتتەر دە بار، – دەگەن ول رەسەيلىك دەپۋتاتتاردىڭ ءسوزىن قولداۋشىلار "اسكەردە بولماعاندار نەمەسە انت قابىلداي تۇرىپ، ونى جەتە تۇسىنبەگەندەر" دەپ ەسەپتەيتىنىن ايتقان.

"قازاق جەرىن وڭاي الا قويا المايسىڭدار. مەن مۇنى رەسەيلىك بارلىق دەپۋتاتقا ايتىپ وتىرمىن. مەن قازاق حالقىنا انت بەرگەم، قازاقستان ءۇشىن ءومىرىمدى قيۋعا ءازىرمىن" دەلىنگەن ۆيدەودا.

ونىڭ ايتۋىنشا، وسىلاي ىستەۋگە دايار تۇرعان كوپتەگەن ەتنوستار بار.

سونىمەن قاتار ول قازاق ءتىلىن ۇيرەنۋگە شاقىرىپ، ءوزى سەكىلدى ويىن اشىق بىلدىرگىسى كەلەتىندەر از ەكەنىن ايتتى. سوزىنشە، ولاردى ۇستانىمى ءۇشىن سوگۋى مۇمكىن.

– مەن انت قابىلداپ، اسكەردە بولعان جىگىتتەرگە "وتاندى ساتپايىق" دەپ قاداپ ايتقىم كەلەدى، – دەدى ول.

ءبۇعان دەيىن رەسەي دۋماسىنىڭ بىرنەشە دەپۋتاتى قازاقستان جەرى مەن ونىڭ تۇتاستىعى تۋرالى "قازاقستان جەرى رەسەي تاراپىنان جاسالعان سىيلىق" دەگەن ماعىنادا ارانداتۋشىلىق سوزدەر ايتقان. بۇل داۋلى مالىمدەمەدەر قازاقستاندا قىزۋ تالقىلانىپ، ازاماتتاردىڭ نارازىلىعىن تۋدىرعان.

رەسەي بيلىگى دەپۋتاتتاردىڭ ءسوزى "رەسمي ۇستانىمدى بىلدىرمەيدى" دەگەن.

قازاقستان بيلىگى داۋلى مالىمدەمەلەرگە نارازىلىق رەتىندە الدىمەن سىرتقى ىستەر مينيسترلىگى ارقىلى ارنايى نوتا جولدادى. ارتىنشا پرەزيدەنت ق.توقايەۆ 2020 جىلعى 31 جەلتوقساندا قازاقستاندىقتاردى جاڭا جىلمەن قۇتتىقتاۋ ساتىندە، 2021 جىلعى 5 قاڭتاردا جاريالاعان ماقالاسىندا "ۇلتتىق مۇددەنى اسپەن دە، تاسپەن دە قورعاۋعا دايىن بولۋىمىز كەرەك" دەپ ءمالىم ەتكەن.